Mesnatën e së premtes skadoi afati për mbledhjen e të paktën dhjetë mijë nënshkrimeve të nevojshme sipas ligjit, për të arritur kushtin e parë për të hyrë në garën për president.
Shtatë janë kandidatët që do të përballen më 24 prill, shkruan alsat.mk.
Profesorja dhe deputetja, Gordana Siljanovska Davkova hyn si kandidate e mbështetur nga VMRO-DPMNE-ja dhe partitë e koalicionit. Ajo është në këtë garë për herë të dytë, duke qenë se në vitin 2019, në rrethin e dytë humbi betejën ndaj kundërkandidatit të saj, Stevo Pendarovski.
Presidenti Pendarovski në këto zgjedhje për mandatin e dytë ka mbështetjen e LSDM-së dhe partive të tjera të koalicionit.
I treti në listë është Maksim Dimitrievski, kryetar i Komunës së Kumanovës, kryetar i lëvizjes “E di” dhe ish funksionar i LSMD-së. Pas tij është Stevço Jakimovski, kryetar i Komunës së Karposhit.
Ministri i Jashtëm, Bujar Osmani është kandidati i BDI-së në këto zgjedhje.
Kreu i Aleancës për Shqiptarët, Arben Taravari ka mbështetjen e koalicionit opozitar shqiptar “VLEN”.
“E Majta” në këto zgjedhje presidenciale do të garojë me kandidaten e saj, profesoren Biljana Vankovska.
Nëse në rrethin e parë asnjëri nga kandidatët për president nuk e merr shumicën e votave, në rrethin e dytë do të votohet për dy kandidatët që kanë marrë më shumë vota.
