Njohësit e çështjeve politike kanë mendime te ndryshme sa i përket mbajtjes se zgjedhjeve në katër komunat veriore. Sipas tyre në veri të vendit është një situatë shumë ndjeshme në prag të zgjedhjeve lokale, prandaj shteti i Kosovës duhet të ketë kujdes për mënyrën se si e trajton këtë çështje.
Zgjedhjet e jashtëzakonshme lokale në katër komunat veriore parashihet të mbahen me 23 prill.
Por kësaj radhe, Lista Serbe e cila ka përkrahjen më të madhe nga serbët e veriut ka njoftuar se nuk do të marrë pjesë në këto zgjedhje.
Kjo parti gëzon mbështetje të madhe edhe nga vet Presidenti i Serbisë, Aleksandar Vuçiq.
Megjithatë, profesori nga universiteti Agder, Abit Hoxha, thotë se zgjedhjet duhet të mbahen pavarësisht se Lista Serbe nuk do të marrë pjesë në to.
Por më i rezervuar sa i përket mbajtjes se zgjedhjeve në katër komunat veriore, po shprehet profesori Dritero Arifi.
Sipas tij nuk janë rrethanat e duhura që të mbahen zgjedhjet, për shkak se nuk do të jenë mjaftueshëm produktive.
Tutje, Hoxha thotë se qytetarët serb janë përballë një situatë të vështirë, për shkak të presionit që vjen nga Lista Serbe.
Kujtojmë që vendimi i Qeverisë së Kosovës për t’i riregjistruar makinat me targa serbe në targa të Kosovës, i shtyu zyrtarët e Listës Serbë të japin dorëheqje nga pozitat e tyre.
