Presidentja e Parlamentit Evropian, Roberta Metsola, i deklaroi 142 dhurata publike, por për 125 të tjera, u mbyll afati i deklarimit. Mediat ndërkombëtare e cilësuan skandal mos-deklarimin e dhuratave të marra, ndërsa këtë veprim e dënoi edhe partia e saj Partia Popullore Evropiane.
Metsola një eurodeputete malteze i deklaroi dhuratat që mori në një procesverbal publik që ligjvënësit rrallë e përditësojnë. Megjithatë, duke e bërë këtë javën e kaluar, ajo humbi afatin për deputetët e PE-së për të deklaruar dhuratat e tyre në lidhje me 125 nga artikujt në listën e saj.
Dhuratat që mori Metsola përfshinin: një kullë model ari nga politikani i lartë maroken Naam Mayara; një fustan i bardhë me qëndisje të artë nga Fawzia Zainal, kryetare e parlamentit të Bahreinit; një shall nga kryeministrja franceze Elisabeth Borne; Kufje pa tela Sennheiser nga Bundestagu Gjerman; një vazo nga presidenca çeke e Këshillit të BE-së; një bluzë e bardhë nga presidentja e Moldavisë Maia Sandu.
Metsola mori gjithashtu shampanjë, çokollata, biskota, kek dhe sallam të thatë, të cilat “u shërbyen gjatë funksioneve të Parlamentit”.
Për 125 nga këto dhurata, deklarimet e Metsola-s erdhën pas afatit për t’i njoftuar në përputhje me rregullat për eurodeputetët.
Përveç dhuratave, ajo nuk arriti të deklarojë zyrtarisht brenda afatit të mandatuar parlamentar se ndërmori disa udhëtime të sponsorizuara gjatë vitit të kaluar, ka raportuar Le Soir.
Më 11, 12 dhe 13 janar të këtij viti, eurodeputetja malteze Roberta Metsola dorëzoi formularë duke pohuar se ajo kishte ndërmarrë deri në pesë udhëtime që ishin të paktën pjesërisht të financuara nga palë të treta gjatë periudhës nga maji deri në tetor të vitit 2022.
Sipas rregullave aktuale parlamentare, eurodeputetëve u kërkohet të plotësojnë dokumentet e kërkuara “jo më vonë se dita e fundit e muajit pas ditës së fundit” të çdo udhëtimi të financuar tërësisht ose pjesërisht nga një palë e tretë.
Udhëtimet e Metsola-s përfshijnë një vizitë në Izrael më 22-24 maj të vitit të kaluar, i paguar nga shteti izraelit; një udhëtim në Davos në maj të financuar nga Fondacioni Victor Pinchuk; një udhëtim në Kopenhagë më 10 qershor të sponsorizuar nga Fondacioni Aleanca e Demokracive; dhe një udhëtim në Beaune në tetor të paguar nga Vëllazëria e Kalorësve të Tastevinit.
Një zëdhënës i eurodeputetes malteze pranoi më tej për Le Soir se është “ndoshta” rasti që bileta e Metsola për finalen e Ligës së Kampionëve në Paris më 28 maj është paguar nga UEFA.
Sipas Politico-s, Metsola humbi afatin kohor për të deklaruar një udhëtim luksoz falas – duke përfshirë një darkë të bollshme dhe një dhomë hoteli prej 350 euro për veten dhe burrin e saj – të gjitha të paguara nga një shoqëri elitare e verërave.
Në tetor të vitit të kaluar, Metsola udhëtoi për në Burgundy, një rajon i famshëm i verës në Francë, për të marrë një pozicion nderi si një “damë” e një vëllazërie dashamirë të verës e quajtur “Confrérie des Chevaliers du Tastevin”, në një darkë me pesë pjata në një kështjellë mesjetare.
Vëllazëria pagoi për qëndrimin e Metsola-s në “Hôtel Le Cep” me pesë yje në qytetin Beaune, në një dhomë që POLITICO ka zbuluar se kushton 349 euro nata, plus taksat. Kjo nuk është në kundërshtim me asnjë nga rregullat e brendshme të Parlamentit, por deputetët kanë kohë deri në fund të muajit pasardhës për të deklaruar publikisht çdo udhëtim, akomodim ose pagë të paguar nga palët e treta, si qeveritë ose OJQ-të.
Nata në hotel ka ndodhur më 22 tetor të vitit të kaluar, por Metsola e ka deklaruar në faqen e Kuvendit më 11 janar të këtij viti, shumë kohë pasi kishte kaluar afati i deputetëve.
