Sot do të fillojë festivali ndërkombëtar i poezisë “Republika”, edicioni i shtatë, i cili do të vazhdojë deri më 16 shkurt. Në këtë edicion do të marrin pjesë 17 poetë. Vlora Ademi, organizatore, tha se në festival do të marrin pjesë Primo Shllaku, poetja Vlora Konushevci, poeti Emin Emini, poetja Ilire Zajmi dhe disa të tjerë.
“Mandej kemi poetë që herë pas here vijnë dhe nuk anashkalohen prej ‘Republikës’, megjithatë u lëshojnë vend të tjerëve. Festivali ‘Republika’ në këtë vit do t’i presë 17 poetë për 17-vjetorin e pavarësisë. Festivali ‘Republika’ është nisur për ta karakterizuar dhe shënuar Ditën e Pavarësisë së Kosovës”, tha ajo.
Ademi në një lidhje të drejtpërdrejtë në “Mirëmëngjesi Kosovë” për RTK-në pohoi se është një platformë ku autorët takohen, njihen mes vete, shkëmbejnë ide, krijimet e tyre, mandej si rezultat ndodhin përkthimet dhe botimet antologjike.
“Ky është qëllimi ynë, diplomacia kulturore, kalimi i kufijve përmes artit”, tha Ademi.
Ajo shtoi se festivalin e hap premiera e dokumentarit “Kufiri i kuq”, i cili paraqet atë ndasinë mes kufirit shqiptar të Shqipërisë andej dhe të Kosovës këndej. Në qendër është figura e shkrimtarit tonë të madh, klasikut Anton Pashku, autor i ndaluar në kohën e komunizmit. rtk.
Më tutje ajo tha se në ditën e nesërme do të ketë një panel diskutimi me përkthyes nga Shqipëria dhe Kosovës për të diskutuar rreth përkthimeve letrare sa cilësore janë, sa ia vlen të përkthehet etj.
