Bllokada e ndërtesës së Radiotelevizionit të Serbisë (RTS) në rrugën Takovska, e nisur nga studentët të hënën rreth orës 23:00, vazhdon edhe sonte. Ajo është planifikuar të zgjasë deri në orën 21:00, gjatë së cilës punonjësve u është lejuar të largohen nga ndërtesa, ndërsa hyrjet e reja nuk janë të lejuara.
Të pakënaqur me mënyrën se si shërbimi publik ka raportuar për protestat e tyre shumë mujore, studentët që organizojnë bllokadën ndodhen përpara hyrjes kryesore të RTS-it, duke e bllokuar simbolikisht hyrjen si një formë proteste.
Të gjitha hyrjet kryesore janë të bllokuara, në njërën prej tyre ndodhen vullnetarë që patrullojnë, në tjetrën janë vendosur barriera metalike, ndërsa hyrja nga rruga Takovska është tërësisht e bllokuar. Për shkak të bllokadës, RTS ka zhvendosur transmetimin e programit në studiot e tij në Koshutnjak, rreth tetë kilometra larg qendrës së Beogradit.
Protesta po zhvillohet në mënyrë paqësore, me pjesëmarrjen e studentëve dhe qytetarëve të cilët, me fishkëllima dhe pankarta, shprehin pakënaqësinë e tyre. Mesazhet kryesore të protestës theksojnë rëndësinë e mendimit kritik, solidaritetit, lirisë dhe shtetit të së drejtës.
Studentët po protestojnë kundër politikës editoriale të RTS-it, duke argumentuar se ajo është e njëanshme dhe e orientuar nga pushteti. Iva Qurçiq, studente e Fakultetit për Media dhe Komunikim, deklaroi se shërbimi publik nuk po përmbush funksionin e tij për të informuar qytetarët në mënyrë të paanshme dhe kërkojnë ndryshime në funksionimin e tij.
“Qëllimi është që të plotësohen kërkesat e studentëve dhe të përmirësohet pozicioni i punonjësve të RTS-it. Besojmë se RTS për vite me radhë nuk ka raportuar objektivisht dhe se gjithçka duhet të ndryshojë nga rrënjët. Një shërbim publik duhet të jetë lider në ndryshime të tilla.”
Studentët kanë bllokuar ndërtesën e RTS-it që nga e hëna në mbrëmje, dhe shkaku i menjëhershëm i protestës ishte një deklaratë e një gazetareje të RTS-it, e cila gjatë një interviste me presidentin e Serbisë i quajti studentët “turmë”. Pas reagimeve të ashpra publike, ajo kërkoi falje, duke deklaruar se fjalët e saj ishin nxjerrë nga konteksti.
Në fillim të protestës ndodhi një incident midis xhandarmërise dhe studentëve që bllokonin hyrjet. Zyrtarët njoftuan se gjatë këtij momenti një pjesëtar i xhandarmërisë u plagos në sy. Presidenti i Serbisë, Aleksandar Vuçiq, i akuzoi studentët për sulm ndaj policit, por pamjet video tregojnë se ai, ne veshje civile, u godit nga kolegët e tij policë.
Në ndërkohë, RTS u ka bërë thirrje studentëve që të “ndalojnë bllokadën e dhunshme”, duke e cilësuar atë si “në kundërshtim me deklaratat e mëparshme të studentëve që kanë pohuar se mbështesin lirinë e punës së institucioneve”.
Studentët e mbledhur po mbështeten edhe nga qytetarët, mes të cilëve ka figura publike dhe deputetë të opozitës. Po ashtu, disa punonjës të RTS-it kanë shprehur solidaritetin e tyre me studentët.
Qytetarët që folën për RTK e cilësuan raportimin objektiv të medias si themelin e një shoqërie demokratike. Sipas tyre, saktësia e informacionit nuk është e rëndësishme vetëm për gazetarinë, por edhe për shkencën dhe zhvillimin shoqëror.
“Jam e angazhuar në shkencë dhe besueshmëria e fakteve është thelbësore. Nëse gjithkush mund t’i interpretojë faktet si të dojë, atëherë shkenca humb kuptimin. Prandaj, kjo protestë është shumë e rëndësishme”, than je qytetare.
“Mbështes studentët sepse kanë të drejtë. Kjo ka zgjatur shumë, dhe ne, megjithëse kemi protestuar për vite, nuk kemi arritur sukses. Besoj se ata do të kenë sukses me mbështetjen e qytetarëve. Nuk kërkojmë asgjë të jashtëzakonshme, vetëm drejtësi dhe një jetë normale”, than je qytetare tjeter.
Përveç RTS-it, është bllokuar edhe ndërtesa e RTV-së në Novi Sad, ku janë të pranishme forca të shumta policore. Po ashtu, dhjetëra studentë dhe qytetarë janë mbledhur para Radiotelevizionit të Kragujevcit si shenjë solidariteti me protestuesit në Beograd dhe Novi Sad.
Këto protesta janë pjesë e një vale më të gjerë demonstratash, të cilat filluan pas shembjes tragjike të një mbulese betoni në stacionin hekurudhor në Novi Sad në nëntor të vitit të kaluar, ku humbën jetën 15 persona. Studentët kërkojnë përgjegjësi nga institucionet kompetente, duke argumentuar se aksidenti ndodhi për shkak të korrupsionit dhe punimeve të dobëta ndërtimore.
Protestat do të vazhdojnë, dhe studentët kanë paralajmëruar një tubim të madh në Beograd më 15 mars. Nga ana tjetër, presidenti Vuçiq ka njoftuar mbajtjen e një kundërmitingu të mbështetësve të tij, por data e saktë ende nuk është përcaktuar./rtk
