Rreth 300 studentë nisën një marsh proteste nga Beogradi drejt Novi Sadit, duke kaluar rreth 80 kilometra për t`u bashkuar me protestat në lidhje me shembjen e mbulesës në stacionin hekurudhor të Novi Sadit, në të cilin humbën jetën 15 persona.
Studentët u ndalën simbolikisht në komunën Zemun në orën 11:52, në momentin kur ndodhi ngjarja, për të nderuar të vdekurit
Gjatë rrugës drejt Novi Sadit kaluan përmes disa komunave të Beogradit, dhe në Batajnicë, qytetarët i pritën me duarrokitje, freskim dhe mbështetje. Një pritje e ngjashme u organizua edhe në Nova Pazova, ku qytetarët u ofruan ujë, ushqim dhe nevoja të tjera.
Protestat e studentëve kanë filluar në nëntor dhe ato përbëjnë një nga lëvizjet më të mëdha studentore në Evropë që nga viti 1968, si dhe një nga valët më të rëndësishme të rebelimit në Serbi që nga viti 2000, shkruan sot Gazeta britanike “Guardian”.
Po ashtu, autoritetet serbe, të udhëhequra nga presidenti Aleksandar Vuçiq, pretendojnë se kërkesat e studentëve janë plotësuar, por studentët në bllokadë kanë deklaruar se Vuçiq nuk është kompetent për të plotësuar kërkesat e tyre dhe se do të vazhdojnë protestat.
