Ende nuk është gjendur helikopteri i rrëzuar i cili po barte presidentin Iranian, Ebrahim Raisi. Mbi 65 ekipe të shpëtimit në terren përkundër motit të lig janë në përpjekje të kërkim-shpëtimit të mbijetuarve. Edhe aleatet e vendit iranian kanë shprehur gatishmërinë për të ndihmuar në proces.
Bota ka kthyer vëmendjen drejt Iranit pas rrëzimit të helikopterit presidencial iranian në të cilin gjendej lideri i Iranit Ebrahim Raisi. Presidenti Ebrahim Raisi po kthehej nga kufiri i Iranit me Azerbajxhanin nga vizita zyrtare atje në kohën kur helikopteri i tij u rrëzua në një zonë të largët pranë Jolfës në provincën e Azerbajxhanit Lindor të Iranit.
Së bashku me homologun e tij nga Azerbajxhanit Ilham Aliyev kishin përuruar një projekt bashkëpunues të një dige, si shenja më e fundit e përafrimit së marrëdhënieve midis dy vendeve.
Sipas medieve shtetërore, në bordin e helikopterit së bashku me presidentit Ebrahim Raisi gjendeshin edhe Ministri i Jashtëm i Iranit, Hossein Amir-Abdollahian, Guvernatori i provincës së Azerbajxhanit Lindor të Iranit, Malek Rahmati dhe Ayatollah Mohammad Ali Ale-Hashem, përfaqësuesi i liderit suprem të Iranit.
Qeveria iraniane nuk ka bërë shumë deklarata pasi ka ende shumë detaje që nuk janë të qarta. Megjithatë, është raportuar se rreth 65 ekipe shpëtimi dhe dronë janë dërguar në zonën ku u rrëzua helikopteri në kërkimin e sipër. Mirëpo, kushtet e rënda të motit po e vështirësojnë kërkimin në vendin ku besohet të këtë rënë helikopteri. Mjegulla e dendur ka pamundësuar dukshmërinë në vetëm pesë metra në zonën malore dhe të pyllëzuar, dhe ajo sipas meteorologëve iranian pritet të vazhdojë gjatë gjithë natës.
Arabia Saudite, Rusia, Turqia dhe Armenia janë deklaruar të gatshme për të ofrua të gjithë mbështetjen e nevojshme në operacionin e kërkim-shpëtimit të helikopterit të rrëzuar iranian. Edhe Bashkimi Evropian nëpërmjet një postimi në rrjete sociale ka deklaruar se ka aktivizuar shërbimin e tij të hartës së reagimit të shpejtë, i njohur si Copernicus, për të ndihmuar në kërkimin e helikopterit të rrëzuar./rtk
