Qeveria në detyrë e Republikës së Kosovës ka mbajtur mbledhje elektronike, në të cilën ka themeluar Këshillin Shtetëror për shënimin e 27-vjetorit të Epopesë së Ushtrisë Çlirimtare të Kosovës në këtë përbërje.
Sipas njoftimit të ekzekutivit, në krye të këtij këshilli është vendosur Ejup Maqedonci, ministër në detyrë i Mbrojtjes, bashkëkryesues është Fadil Nura, kryetar i Komunës së Skenderajt, derisa anëtarë janë Hajrulla Çeku, ministër në detyrë i Kulturës, Rinisë dhe Sportit, Elbert Krasniqi, ministër në detyrë i Administrimit të Pushtetit Lokal, Bashkim Jashari, Komandant i Forcës së Sigurisë së Kosovës, Gazmend Hoxha, Drejtor i Përgjithshëm i Policisë së Kosovës, dhe përfaqësues nga organizatat e dala nga Lufta e UÇK-së. Po ashtu, ekzekutivi ka ftuar që nga një përfaqësues ta dërgojnë edhe Zyra e Presidentes, Kuvendi i Kosovës dhe Asociacioni i Komunave të Kosovës.
