Me datën 21 korrik pritet të fillojë edicioni i katërt i Festivalit Ndërkombëtar i Operës- Rame Lahaj me moton “T’knoft zemra”.
Besmir Vokopola-koordinator i Programit Artistik dhe Marrëdhënieve Ndërkombëtare në RLIOF i ftuar në emisionin e mëngjesit “Mirëmëngjesi Kosovë” në RTK foli për agjendën e festivalit, duke shtuar se motoja “T’knoft zemra” ka karakter personal nga aspekti i tenorit me famë ndërkombëtare Rame Lahaj. Vokopola u shpreh e këtë vit kanë dashur t’i japin rëndësi gërshëtimit të vlerave të trashigimisë kulturore, pra të Kosovës dhe Shqipërisë por edhe ndërlidhjes me gjininë lirike operistike.
“Jo më kot një pjesë e mirë e artistëve që do të vijnë këtë vit, në radhë të parë vijnë nga e gjithë bota dhe përpos cilësisë artistike të padiskutueshme pasi flasim për arstistë që përformojnë në skenat më të rëndësishme botërore do sjellin pak edhe aromën e prejardhjes së tyre dhe ky gërshetim do të vërehet gjatë gjithë kalendarit të aktiviteteve,” theksoi Vokopola.
Tutje, koordinatori i programit foli edhe për ekspozitën, e cila do të hap festivalin dhe që për moto ka shprehjes “A thua ëndërr ishe ti”. Ekspozita do të jetë e hapur nga data 22 korrik deri me datën 31 korrik nga ora 12:00 deri në orën 19:00 në galerinë e Universitetit të Arteve dhe sipas Vokopolës publiku do të ketë mundësinë të shoh disa prej veprave të artistëve të njohur të Kosovës.
Tutje, Vokopola u shpreh se partneriteti i Rame Lahaj dhe ekipit me artistët ndërkombëtar dhe intersimi i këtyre artistëve për ta vizituar Kosovën e lehtëson organizimin e një festivali të tillë në Kosovë.
Festivalit Ndërkombëtar i Operës- Rame Lahaj edicionin e katërt do ta fillojë me datën 21 korrik dhe do të mbarojë me datën 2 gusht, ky festival të gjitha aktivitetet i ka për gjithë publikun përveç natës së fundit-galas e cila është me bileta, paratë e të cilave shkojnë për fondacionin e këtij festivali.
