Presidenti i Shteteve të Bashkuara, Donald Trump, ka deklaruar se një marrëveshje për rihapjen e Ngushticës së Hormuzit mund të arrihet që të mërkurën, ndërsa Irani dhe Omani po afrohen drejt një dakordimi për këtë rrugë ujore strategjike, e cila mund të lehtësojë presionin mbi ekonominë globale dhe potencialisht të ndihmojë në përfundimin e luftës.
Shtetet e Bashkuara, së bashku me Izraelin, nisën luftën më 28 shkurt, duke përmendur si objektiva rrëzimin e qeverisë në Teheran dhe ndalimin e programit bërthamor të Iranit. Sipas raportimeve, këto objektiva nuk u arritën dhe konflikti është përqendruar tashmë te kontrolli i Ngushticës së Hormuzit, pasi sulmet iraniane ndaj anijeve kanë bllokuar pothuajse tërësisht qarkullimin në këtë rrugë detare, raporton AP, transmeton Klankosova.tv.
Duke folur para gazetarëve gjatë vizitës së tij në Kaliforni, Trump komentoi një raport të publikuar nga “Axios”, sipas të cilit njoftimi për marrëveshjen mund të bëhet të mërkurën.
“Mund të ndodhë. Nesër ose pasnesër. Është bërë shumë përparim”, tha Trump të martën në mbrëmje, sipas kohës lokale në Kaliforni.
Administrata Trump ka refuzuar më herët çdo marrëveshje që do t’i jepte Iranit kontroll mbi ngushticën, e cila para luftës ishte një rrugë ujore ndërkombëtare e hapur. Një marrëveshje e tillë do të konsiderohej një humbje e madhe për ShBA-në dhe një devijim nga normat ndërkombëtare.
Mbyllja e Ngushticës së Hormuzit, përmes së cilës kalonte rreth një e pesta e naftës dhe gazit natyror në botë, ka rritur ndjeshëm çmimet e karburanteve dhe mallrave bazë, duke shkaktuar tronditje në ekonominë globale. Ndërkohë, Trump po përballet edhe me presion në rritje për t’i dhënë fund një lufte jopopullore përpara zgjedhjeve të ndërmjetme për Kongresin.
Fillimisht, çmimet e naftës ranë pas shpresave për një marrëveshje që do të mundësonte rifillimin e transportit detar, por më pas u rritën sërish lehtë. Të mërkurën, nafta “Brent” tregtohej rreth 80 dollarë për fuçi, megjithëse mbetet nën nivelet kulmore të arritura gjatë konfliktit.
Ditët e fundit, Trump ka alternuar mes kërcënimeve për sulme të mëdha ushtarake dhe deklaratave në mbështetje të përpjekjeve diplomatike për zgjidhjen e krizës.
