Boksieri shqiptar Jurgen Uldedaj ka mbrojtur me sukses titullin e kampionit të botës në versionin IBO, pas fitores ndaj britanikut Austine Nnmadi, në një përballje të fortë dhe të balancuar, duel i zhvilluar të shtunën në mesnatë.
Pavarësisht pritshmërive për një triumf më të lehtë, përballja rezultoi mjaft e vështirë, me Nnmadi që i bëri rezistencë serioze gjatë gjithë meçit.
Uldedaj e nisi ndeshjen më mirë, duke diktuar ritmin dhe duke realizuar më shumë goditje në raundet e para, i mbështetur fuqishëm edhe nga publiku.
Pas raundit të pestë, britaniku arriti të rrisë intensitetin dhe të rikthehet në duel, por boksieri shqiptar ruajti qetësinë dhe kontrollin taktik, duke mos lejuar surpriza në momentet vendimtare.
Në fund, vendimi i gjyqtarëve ishte unanim në favor të Uldedajt, me pikë 115–113, duke konfirmuar mbrojtjen e suksesshme të titullit.
Me këtë fitore, Uldedaj regjistron triumfin e tij të 23-të në karrierë profesionale dhe vazhdon të mbetet kampion bote në kategorinë e tij në IBO.
