Pas vendimit të fundit në lidhje me njohjen e pronës së Manastirit të Deçanit, Kosova është edhe një hap më afër anëtarësimit në Këshillin e Evropës. Kështu thonë edhe analistët politikë. Megjithëkëtë, ka nga ta që thonë se përkundër vendimit për pronën e manastirit, anëtarësimi i Kosovës në Këshillin e Evropës nuk është i garantuar.
Kryeministri Albin Kurti njoftoi dje se ka urdhëruar Agjencinë e Kadastrave që të zbatojë vendimin e Gjykatës Kushtetuese, që ia njeh si pronë Manastirit të Deçanit 24 hektarë që dikur ishin të dy ndërmarrjeve shoqërore. Kurti tha se këtë po e bënë pasi është kushti i vetëm për anëtarësimin e Kosovës në Këshillin e Evropës.
“Nuk do e ndryshoj qëndrimin ndaj këtij vendimi të dëmshëm asnjëherë. Në anën tjetër, nuk ka dyshim se anëtarësimi i Kosovës në Këshillin e Evropës do të ishte jo vetëm një fitore historike, por edhe një hap gjigant për republikën tonë drejt njohjes nga pesëshja evropiane që mundëson anëtarësimin në NATO dhe Bashkimin Evropian”, tha Kurti gjatë mbledhjes së qeverisë.
Me plotësimin e kërkesës së Këshillit të Evropës që Kosova të zbatojë vendimin e Kushtetueses për pronat e Manastirit të Deçanit, anëtarësimi në këtë organizatën ndërkombëtare është drejt fundit, vlerëson analisti politik, Artan Muhaxhiri.
“Anëtarësimi i Kosovës në Këshillin e Evropës pas vendimit për manastirin, është edhe një shembull që do ta dëshmojë se palët që bëjnë kompromise kanë edhe përfitime. Pra, nëse Kosova do të anëtarësohet me shpejtësi në Këshillin e Evropës, ky do të ishte një shembull konkret për palët që të bëjnë kompromise edhe në të ardhmen, sepse pas kompromiseve, vijnë edhe përfitimet”, tha ai.
Vendimi për njohjen e pronës së Manastirit të Deçanit, natyrisht se i ka hapur rrugë anëtarësimit në Këshillin e Evropës. Kështu thotë për Radio Kosovën analisti politik, Blerim Burjani, sipas të cilit, megjithëkëtë, anëtarësimi në organizatën evropiane nuk është i garantuar.
“Para anëtarësimit me siguri se do të ketë edhe kushte të tjera, por nuk ka të bëjë asgjë që ndërlidhet me çështjen e asociacionit të komunave me shumicë serbe. Por, natyrisht se nuk ka ndonjë garanci të fuqishme se automatikisht me pranimin e zbatimit të vendimit për Manastirin e Deçanit, Kosova do të votohet mjaftueshëm për të marrë statusin e shtetit anëtar”, tha ai.
Për anëtarësim në Këshillin e Evropës, Kosova kishte aplikuar në maj të vitit 2022. Në prill të 2023-ës kishte kaluar me sukses fazën e parë të anëtarësimit, i cili synohet të përfundohet me sukses muajve në vijim.
