Kryeministri i Kosovës Albin Kurti ka komentuar vendimin e djeshëm të Komitetit për Çështje Politike në Asamblenë Parlamentare të KiE-së, që rekomandon Këshillin e Evropës që ta ftojë Kosovën për t’u bërë anëtare, ndërsa theksoi se ky është lajm i mirë.
Ndërsa e quan lajm të mirë, kryeministri u shpreh se është vetëm hapi i parë, teksa muajin tjetër do të votohet në Asamblenë Parlamentare në Këshill të Evropës dhe hapi përmbyllës është ai në mbledhjen e Këshillit të Ministrave në muajin maj.
“Është lajm tejet i mirë për Evropën, për kombin shqiptar, për demokracinë që në këtë epokë gjeopolitike e historike, Federata ruse është jashtë e Republika e Kosovës po hynë brenda”, u shpreh Kurti.
Ai tutje tha se bashkë me këtë proces, njëkohësisht po bëhen hapa edhe drejt integrimit evropian, transmeton rtklive.“Synimi ynë është anëtarësimi në BE dhe në anën tjetër anëtarësimi në NATO, ku dihet që në të dy këto dy makanizma tejet të rëndësishëm botëror, edhe politik edhe ushtarak, edhe vleror edhe strategjik, ne, do të jemi pranë shteteve mosnjohëse të cilët në këtë mënyrë do ta kenë një argument të fuqishëm për skeptikët në shtetet e tyre që ta bëjnë hapin vendimtar dhe ta pranojnë e ta njohin pavarësinë e Kosovës”, ka theksuar kryeministri Kurti.rtk.
