Policia e Kosovës ka dhënë detaje shtesë për vrasjen që tronditi dje Pejën.Me armë zjarri është qëlluar një person rreth 40-vjeçar, të cilit dyshohet se ia mori jetën arsimtari i vajzës së të ndjerit.
Në raportin 24 orësh, Policia ka bërë të ditur se i dyshuari për vrasje është akoma në arrati.
Në vendin e ngjarjes janë gjetur dhe sekuestruar një pistoletë dhe disa gëzhoja, derisa trupi i viktimës është dërguar në Instituin e Mjekësisë Ligjore për obduksion.
“Rr. Xhin Gazuli, Pejë 18.05.2021-15:39. Është raportuar se në rrethana të panjohura, një i dyshuar mashkull ka qëlluar me armë zjarri për vdekje viktimën mashkull kosovar dhe është larguar në drejtim të panjohur. Njësit relevante dhe ekipi mjekësor kanë dalë në vendin e ngjarjes ku është konfirmuar vdekja e viktimës ndërsa afër tij është gjetur dhe sekuestruar një pistoletë dhe disa gëzhoja. Me vendim të prokurorit trupi i pajetë i viktimës është dërguar në IML për obduksion. Rasti vazhdon të hetohet”, thuhet në raportin 24 orësh të Policisë së Kosovës.