Presidenti i Serbisë, Aleksandar Vuçiç, ka deklaruar se planifikon të japë dorëheqjen nga posti i presidentit brenda tre deri në katër muajve të ardhshëm, ndërsa njoftoi se Partia Progresive Serbe (SNS) do të organizojë një tubim të madh në Beograd më 27 qershor, ku do të prezantojë elemente të platformës së saj zgjedhore.
Gjatë një interviste për televizionin Prva, Vuçiç përsëriti se synon të largohet nga presidenca, por theksoi se ende nuk është vendosur nëse Serbia do të shkojë vetëm në zgjedhje të parakohshme presidenciale apo në zgjedhje të njëkohshme presidenciale dhe parlamentare. Sipas tij, vendimi do të merret nga institucionet kompetente shtetërore.
Ai bëri të ditur gjithashtu se SNS do të mbajë një tubim para ndërtesës së Asamblesë Kombëtare në Beograd më 27 qershor, ku do të prezantohet emri i listës zgjedhore, sloganet e fushatës dhe një pjesë e programit politik për zgjedhjet e ardhshme.
Njoftimi vjen në një periudhë tensionesh politike në vend, pas muajsh protestash të udhëhequra nga studentët, të nxitura nga tragjedia në stacionin hekurudhor të Novi Sadit, ku humbën jetën 16 persona pas shembjes së një tende. Lëvizja studentore kishte kërkuar zyrtarisht zgjedhje të parakohshme parlamentare dhe kishte paralajmëruar pjesëmarrjen me një listë të pavarur zgjedhore.
Më herët gjatë këtij muaji, Vuçiç kishte deklaruar se zgjedhjet parlamentare do të mbaheshin “menjëherë pas verës”. Pas sinjalizimit për largimin e tij nga posti i presidentit, në qarqet politike serbe po shtohen spekulimet se ai mund të kryesojë listën zgjedhore të SNS-së si kandidat për kryeministër.
Në intervistën e tij, Vuçiç kritikoi ashpër kundërshtarët politikë, duke i akuzuar se nuk kanë një program të qartë politik dhe se janë fokusuar në përpjekjet për ta diskredituar personalisht.
Ai sulmoi gjithashtu televizionin N1, duke pretenduar se publiku i këtij mediumi po mbahet në një “flluskë gënjeshtrash dhe pavërtetësish” dhe se atij i është pamundësuar paraqitja në këtë kanal.
“Nuk më lejohet të shfaqem atje sepse njerëzit do të mund të dëgjonin se çfarë është e vërtetë dhe çfarë jo”, deklaroi Vuçiç.
Nga ana tjetër, N1 ka mohuar vazhdimisht pretendime të tilla, duke theksuar se presidenti serb është ftuar në shumë raste gjatë viteve të fundit, por ka refuzuar të marrë pjesë në emisionet e rrjetit.
Debati u rikthye në vëmendje pas një episodi ku eurodeputeti Sandro Gozi sfidoi publikisht Vuçiçin që t’i bashkohej një interviste në N1. Më pas, paraqitja e Gozit në këtë televizion u anulua, pasi redaksia e konsideroi të papërshtatshme praktikën e ftesave të ndërsjella mes politikanëve dhe theksoi pavarësinë e saj editoriale në përzgjedhjen e të ftuarve./Top Channel
