Presidenti ukrainas, Volodymyr Zelenskyy, ka bërë të ditur se ka zhvilluar një sërë telefonatash dhe takimesh me sekretarin e përgjithshëm të NATO-s, Mark Rutte dhe udhëheqësit e lartë të Bashkimit Evropian (BE) për të diskutuar propozimin prej 28 pikash të SHBA-së për t’i dhënë fund luftës, transmeton Anadolu.
Zelenskyy tha se Rutte ofroi ngushëllime për “sulmin e tmerrshëm” të Rusisë në Ternopil, në të cilin Ukraina tha se u vranë 31 persona.
“Ukrainasit, më shumë se kushdo tjetër në botë, duan që kjo luftë të përfundojë, vrasjet të ndalen dhe të arrihet një paqe dinjitoze”, tha Zelenskyy, duke shtuar se ata shqyrtuan opsionet diplomatike të disponueshme dhe planin amerikan.
Më vonë, ai foli me presidentin e Këshillit Evropian, Antonio Costa dhe presidenten e Komisionit Evropian, Ursula von der Leyen.
“Ne të gjithë e vlerësojmë angazhimin e Amerikës dhe të presidentit Trump për t’i dhënë fund luftës dhe po punojmë së bashku për të siguruar që ky të bëhet një plan i përbashkët dhe plotësisht i harmonizuar”, tha ai, duke shtuar se ekipet nga Ukraina, SHBA-ja dhe Evropa do të punojnë së bashku në ditët në vijim.
Zelenskyy gjithashtu zhvilloi një bisedë telefonike me ministrin e Mbrojtjes të Lituanisë, Robertas Kaunas, duke diskutuar nevojat e mbrojtjes, perspektivat e prodhimit të përbashkët dhe mundësitë për një “fund të drejtë të luftës”.
Ai falënderoi Lituaninë për mbështetjen e saj të gjatë dhe për bashkimin me iniciativën PURL, e cila i mundëson Ukrainës të sigurojë armë amerikane.
Ukraina ka intensifikuar kontaktet diplomatike teksa propozimi i azhurnuar me 28 pika i SHBA-së qarkullon midis partnerëve.
