Dhuna në familjet kosovare tash veçse është bërë shqetësuese, numri i rasteve që po shtohen çdo ditë nuk janë edhe të pakta. Ashtu siç ka njoftuar, Policia e Kosovës në raportin 24-orësh, konfirmohet se vetëm gjatë 24-orëve janë shënuar 12 raste të reja të dhunës në familje, e që fatkeqësisht bashkëshortët janë ata që kanë ushtruar dhunë ndaj grave të tyre, duke mos munguar edhe kur babai ka rrahur vajzën e tij të mitur e që ky rast ka ndodhur në Gjakovë, raporton KosovaPost.
Të gjitha këto ngjarje të papritura, janë lajmëruar në Polici dhe ka prej të dyshuarve që janë dërguar edhe në mbajtje shkak i lëndimeve trupore që iu kanë shkaktuar familjarëve të tyre.
Duke i parë këto rritje të rasteve, kur dhuna fizike ndaj gjinisë së kundërt po zë vend pothujase çdo ditë në familjet tona është shqetësuese edhe fakti se po shkon drejt normalizimit kjo dukuri, e cila më pastaj sigurisht se paraqet rrezik shumë të madh për shoqërinë tonë.
Psikologu, Naim Telaku në një prononcim për KosovaPost tha se është tejet shqetësuese rritja e numrit të rasteve kur dhuna është prezente në familjet kosovare.
“Duke patur parasysh numrin e vogël të banorëve që ka Kosova, jo më shumë se 1.8 milion, kjo shifër është brengosëse dhe frikësuese në të njëjtën kohë. Ndër të tjera, për shkak se pasqyron një rekord të ri në trendin e rritjes së dhumës familjare që nga pandemia Covid19. Gjithashtu, shumë shqetësuese janë edhe përshtypjet se me rritjen e përpjekjeve për sensibilizim kundër dhunës familjare, dhuna po shtohet dhe nuk po ulet si dhe, efektshmëria që lë shumë për të dëshiruar e veprimeve të organeve të rendit dhe zbatimit të ligjit, në luftën e tyre kundër dhunës në familje”, tha Telaku.
Tutje, psikologu rreshtoi edhe disa faktorë të cilët mund të jenë shkaktarët e dhunës: “Stina e vjeshtës dhe e dimrit, imponon që njerëzit të kalojnë më shumë kohë në mbledhi familjare dhe brenda mureve të shtëpisë. Ndër pasojat e kësaj është edhe rritja e stresit ndërpersonal, që rezulton me veprime impulsive dhe agresive kundër personave të afërt”, shtoi ai.
“Tjetër, inflacioni që ka kapluar ekonomitë familjare në vend, rritë pasigurinë materiale dhe financiare në veçanti, që manifestohet pastaj me një pasiguri të përgjithshme psikologjike. Një pasiguri e tillë, lehtë mund të përkthehet në gjendje ankthi dhe stresi, të cilat, jo rrallë manifestohen me sjellje impulsive, të pamatura dhe me raste agresive.
Së fundmi, studimet tregojnë se ekspozimi i skajshëm medial me lajme të dhunës, kjo brenda një kulture kolektiviste siç është kjo e jona, bënë që njerëzit të normalizohen me dhunën dhe më lehtë të bëhen praktikues të saj.
Kujtojmë se faktorët e lartëcekur, bashkë me faktorët e tjerë të zakonshëm si mungesa e edukimit, historia familjare e dhunës, kultura patriarkale, përodorimi i alkoolit, pozita e pafavorshme e gruas në shoqëri, konfliktet e mosmarrëveshjet familjare, e të tjera, janë të ndërlidhur me statistikat brengosëse e frikësuese të 24 orëve të fundit, për dhunën familjare në Kosovë”, tha Naim Telaku për KosovaPost.