Ministria e Arsimit dhe Shkencës ka organizuar sot Provimin e Maturës Shtetërore në 55 qendra të testimit në të gjithë Kosovën, përcjell KosovaPost.
Për këtë afat, përmes platformës eKosova kanë aplikuar gjithsej 5,033 kandidatë, ndërsa pas shqyrtimit dhe verifikimit janë aprovuar 4,967 prej tyre.
Testimi ka nisur në orën 10:00, sipas planifikimit dhe procedurave të përcaktuara për administrimin e provimit.
Gjatë procesit, 18 kandidatë janë përjashtuar nga provimi pasi janë kapur me telefona, në kundërshtim me rregullat e përcaktuara për mbarëvajtjen e testimit.
Ministria e Arsimit ka falënderuar komisionerët, administratorët dhe të gjithë personat e angazhuar për organizimin dhe mbarëvajtjen e Provimit të Maturës Shtetërore.
