Pas disa orësh kërkime, është gjetur trupi i pajetë i një 46-vjeçari, i cili ishte raportuar i zhdukur nga familjarët e tij.
Zëdhënësi i Policisë për rajonin e Ferizajt, Kanun Veseli, ka konfirmuar se në operacionin e kërkimit janë përfshirë njësitë përkatëse policore, njësia K9 dhe Shoqata për Kërkim dhe Shpëtim e Kosovës.
Sipas Veselit, rasti ishte raportuar të mërkurën në mbrëmje, pasi familjarët kishin njoftuar se 46-vjeçari ishte larguar nga shtëpia dhe nuk kishin arritur të kontaktonin me të.
Gjatë kërkimeve, në zonën e Parkut të Pishave, në Rahovicë, është gjetur vetura e tij e markës “Skoda”, me targa të huaja.
“Për shkak të rrethanave të rastit, në kërkim janë angazhuar njësitë relevante policore, përfshirë njësinë K9 dhe Shoqatën për Kërkim dhe Shpëtim të Kosovës”, deklaroi Veseli.
Pas disa orësh kërkimesh, është gjetur një trup i pajetë, për të cilin dyshohet se i përket personit të raportuar të zhdukur.
“Në vendin e ngjarjes kanë dalë edhe ekipet e emergjencës dhe njësitë përkatëse policore. Rrethanat e rastit janë duke u hetuar, ndërsa informacione të tjera pritet të bëhen të ditura përmes raportit vijues të Policisë”.
