Kryeministri indian Narendra Modi i tha presidentit rus Vladimir Putin të martën se vdekja e fëmijëve të pafajshëm ishte e dhimbshme dhe e tmerrshme, një ditë pas një sulmi vdekjeprurës në një spital për fëmijë në Kiev.
Vërejtja e theksuar e liderit indian ishte një qortim i nënkuptuar ndaj Putinit, i cili pak çaste më parë e kishte mirëpritur atë në Kremlin me një deklaratë të ngrohtë për rëndësinë e lidhjeve strategjike mes dy vendeve.
Ukraina thotë se ka gjetur fragmente të një rakete lundrimi ruse Kh-101 në spitalin e fëmijëve, e cila u godit të hënën gjatë një vale sulmesh ruse që vranë të paktën 41 ukrainas në të gjithë vendin.
Rusia tha, pa dhënë prova, se ishte një sistem ukrainas kundër raketave që goditi spitalin.
“Pavarësisht nëse është luftë, konflikt apo sulm terrorist, çdo person që beson në njerëzimin, ka dhimbje kur ka humbje jetësh”, tha Modi.
“Por edhe në atë, kur vriten fëmijë të pafajshëm, zemra rrjedh gjak dhe ajo dhimbje është shumë e tmerrshme”.
Nuk është hera e parë që Modi ka kritikuar Rusinë për veprimet e saj në Ukrainë. Në shtator 2022, ai i tha Putinit se “epoka e sotme nuk është një epokë lufte” dhe Putin tha në atë kohë se i kuptonte shqetësimet e Modit.
India, megjithatë, nuk e ka dënuar pushtimin e Rusisë dhe ka shfrytëzuar rastin për të blerë sasi rekord të naftës ruse me zbritje pasi sanksionet kanë shkatërruar tregtinë e Moskës me Perëndimin, shkruan Reuters, transmeton Klankosova.tv.
