Kryetari i Lidhjes Demokratike të Kosovës Lumir Abdixhiku ka deklaruar se LDK-ja dhe Vjosa Osmani po nisin një rrugëtim të ri politik për Kosovën, duke e cilësuar këtë bashkim si fillimin e “valës më të madhe politike” që ka parë vendi. Ai tha se partia po vjen më e fortë, më e bashkuar dhe më e përkushtuar për të ardhmen e Kosovës.
“Është nder, është kënaqësi, është ndjenjë e jashtëzakonshme të mblidhemi sërish, edhe një herë, për të nisur një rrugëtim, një rrugëtim të madh përcaktues për fatin e Republikës”, deklaroi ai në tubimin e përbashkët me Vjosa Osmanin, të quajtur “Tubimi i Bashkimit”.
Abdixhiku tha se ky bashkim po nis “valën më të madhe politike” që, sipas tij, ka parë Kosova.
“Për ta thënë qartë, për ta thënë thjeshtë, për ta thënë zëshëm, për ta thënë krejt në këtë fillim, nuk ka asnjë dyshim e sonte kjo ditë, kjo natë, ky tubim, kjo forcë e ky bashkim po e nis valën më të madhe politike që ka parë Kosova ndonjëherë”, u shpreh Abdixhiku.
Ai theksoi se LDK-ja po vjen “më e fortë” dhe “më e bashkuar”.
“Po vijmë këtë herë më shumë, këtë herë më të fortë, këtë herë më të bashkuar, këtë herë më të përkushtuar, këtë herë zemrën plot, mendjen e fortë, vullnetin edhe më të gurtë. Këtë herë po vijmë si një, kjo është LDK-ja jonë”, deklaroi ai.
Abdixhiku tha se para qytetarëve po qëndron jo vetëm si kryetar i LDK-së dhe kandidat për kryeministër, por edhe si “ëndërrimtar i së ardhmes”.
“Qëndroj para jush jo vetëm si kryetar i formacionit të vetëm pavarësist e demokratik në vend, jo vetëm si kandidat i sapo nominuar për kryeministër, po qëndroj sikurse ju, sikurse secili prej jush, si një ëndërrimtar i madh i të ardhmes që duam ta kemi”, tha ai.
Në fjalimin e tij, ai theksoi se kësaj rruge i ka hyrë së bashku me një grua të fortë dhe të pathyeshme.
“Dhe në këtë të ardhme, nuk jam ëndërrimtar i vetëm. Këtë herë jam bashkë me një grua të fortë, të drejtë e të pathyeshme që sot qëndron krah nesh për një qëllim më të madh se secili prej nesh. Në këtë rrugëtim jam bashkë me Vjosa Osmanin”, deklaroi Abdixhiku.
Ai shtoi se synimi i tyre është një e ardhme më e mirë për Kosovën.
“Nëse nuk e kemi, do ta kërkojmë. Nëse nuk e gjejmë, do ta bëjmë. Do të bëjmë gjithçka që kjo e ardhme të jetë e mbarë, e mbarë për popullin e Kosovës”, tha ai.
Sipas Abdixhikut e ardhmja e vendit nuk u takon atyre që “ndajnë e përçajnë”.
“Kjo e ardhme nuk u takon atyre që ndajnë e përçajnë, kjo e ardhme nuk u takon atyre që propagandojnë e mashtrojnë, kjo e ardhme nuk u takon atyre që jetojnë në krizë e amulli, me mllef, në terr e në zi. Kjo e ardhme është plot dritë për Republikën e Kosovës”, tha ai.
