Rasti i ish agjentit të arrestuar të FBI-së po vazhdon të jetë në qendër të vëmendjes të mediave ndërkombëtare dhe sidomos ato amerikane.
Ish zyrtari i lartë i kundërzbulimit të FBI-së, Charles McGonigal, i arrestuar muajin e kaluar nga autoritetet amerikane, nën dyshimin se ka shkelur sanksionet amerikane ndaj Rusisë duke punuar për oligarkun rus Oleg Deripaska.
Charles McGonigal ka punuar për sektorin e kundërzbulimit të FBI-së, derisa u largua nga FBI-ja në shtator të vitit 2018 dhe ndër të tjera mbulonte edhe Shqipërinë dhe Bosnje Hercegovinën.
Ai akuzohet se ka marrë 225 mijë dollarë nga një ish-punonjës i shërbimeve sekrete të Shqipërisë dhe ka zhvilluar një sërë takimesh me biznesmenë dhe politikanë në Shqipëri , Kosovë dhe Bosnje, por pa i raportuar ato sipas rregullave.
Deputeti i Vetëvendosjes Artan Abrashi ka publikuar një fotografi të ish-Ambasadores së Kosovës në Amerikë Vlora Çitakut me ish-agjentin kontrovers të FBI-së duke thënë se SHBA-ja po heton nëse ish-agjenti i lartë i FBI-së Charles McGonigal ka marrë pagesa ose dhurata nga zyrtarë qeveritarë në Mal të Zi, Shqipëri, Bosnjë dhe Hercegovinë apo Kosovë.
Deputeti Abrashi ka thënë se Ish-ambasadorja dhe tash nënkryetarja e PDK-së, Vlora Çitaku është mirë të na njoftojë për lidhjet dhe takimet me këtë person dhe temat e diskutuara.
