Algjeria kërkoi një seancë urgjente të hapur të Këshillit të Sigurimit të OKB-së për të martën e ardhshme për të diskutuar sulmin izraelit ndaj një shkolle që strehonte personat e zhvendosur në qytetin e Gazës.
Kërkesa e Algjerisë, si një anëtare jo e përhershme e Këshillit të Sigurimit, për mbledhjen urgjente vjen “në përgjigje të zhvillimeve serioze të fundit në territoret e pushtuara palestineze, veçanërisht pas sulmit ajror të kryer nga ushtria okupuese sioniste në shkollën Al-Tabin. ”, njoftoi agjencia zyrtare e lajmeve algjeriane, duke cituar një burim diplomatik të paidentifikuar në Nju Jork.
Ai tha se “kërkesa është bërë në konsultim me Shtetin e Palestinës” dhe “është mbështetur nga shtetet e tjera anëtare të Këshillit të Sigurimit (nuk specifikohet).
Të paktën 100 njerëz u vranë dhe disa u plagosën kur avionët izraelitë shënjestruan palestinezët që kryenin lutjet e sabahut (agimit) në shkollën Al-Tabin në lagjen Al-Daraj.
Me bombardimin e shkollës, numri i shkollave të shënjestruara nga ushtria izraelite në qytetin e Gazës në javën e fundit është rritur në gjashtë, sipas një raportimi të Anadolu.
Pavarësisht thirrjeve të enjten nga ndërmjetësit, duke përfshirë Egjiptin, SHBA-në dhe Katarin për të ndaluar armiqësitë, për të arritur një armëpushim dhe një marrëveshje për shkëmbimin e pengjeve, Izraeli vazhdon me ofensivën e tij vdekjeprurëse kundër Rripit të Gazës.
Sulmi izraelit kundër Gazës ka vrarë rreth 39,800 viktima që nga tetori, pas një sulmi ndërkufitar nga grupi i rezistencës palestineze, Hamasi.
Izraeli akuzohet për gjenocid në Gjykatën Ndërkombëtare të Drejtësisë (ICJ), e cila e urdhëroi atë të ndalojë menjëherë operacionin e tij ushtarak në qytetin jugor Rafah, ku më shumë se 1 milion palestinezë kishin kërkuar strehim nga lufta përpara se të pushtohej më 6 maj.
