Dy persona, njëri 22 dhe tjetri 21-vjeçar janë arrestuar nën dyshimet se kanë kryer një grabitje të armatosur, me ç’rast kanë marrë disa të holla.
Rasti ka ndodhur në orët e para të mëngjesit të ditës së djeshme në një pikë karburanti në Kaçanik.
Policia ka bërë të ditur se fillimisht pas shikimit të kamerave kanë identifikuar dy lokacione, pas bastisjes të së cilave kanë gjetur armë dhe gjësende tjera.
“Hetuesit rajonal pas një pune intensive hetimore , grumbullimit të informacioneve në terren , shikimit të kamerave të sigurisë, kanë arritur të identifikojnë dy persona, të cilët dyshohet se kanë kryer grabitjen, ndërsa kanë bastisur dy lokacine të dy personave të dyshuar dhe aty kanë gjetur e më pas kanë konfiskuar: 3 armë të zjarrit , 2 pushkë automatike dhe një pistoletë, sasi e municionit , karikatorë, një radiolidhje, sasi e narkotikëve, një shufër metalelike, dorëza , maskë ,telefona, me të cilat dyshohet se është kryer grabitja”, thuhet në një njoftim.
Teksa, ka arrestuar dy persona, njëri 21 e tjetri 22-vjeçar.
“Dy të dyshuarit K.Ç ( M/K) i moshës 22 vjeçar dhe A.Ç ( M/K) i moshës 21 vjeçar janë arrestuar dhe shoqëruar në Sektorin Rajonal të Hetimeve dhe pas intervistimit nga policët hetues, me vendim të prokurorit të rastit janë ndaluar në mbajtje për 48 orë, për procedura tjera hetimore, ndërsa rasti është cilësuar ‘’Grabitje dhe armëmbajtje pa leje’’”, bëhet e ditur tutje në njoftim.
