Një person me inicialet F.Z. është arrestuar nën dyshimin se ka sulmuar deputetin e Kuvendit të Kosovës, Fahrush Rexhepi.
Sipas Prokurorisë, me vendim të prokurorit, F.Z. është ndaluar për 48 orë, nën dyshimin për kryerjen e veprës penale “Sulmi ndaj personit zyrtar”.
Lidhur me rastin, Prokurori i Shtetit ka paraqitur në Gjykatën Themelore në Prishtinë kërkesë për caktimin e masës së paraburgimit ndaj të dyshuarit.
“Referuar kërkesës suaj, ju njoftojmë se me vendim të Prokurorit të Shtetit, është ndaluar për 48 orë, një person me inicialet F.Z., nën dyshimin e kryerjes së veprës penale ‘Sulmi ndaj personit zyrtar’, nga neni 402 i Kodit Penal të Republikës së Kosovës. Lidhur me rastin në fjalë, Prokurori i Shtetit, pranë Gjykatës Themelore në Prishtinë, ka paraqitur kërkesë për caktimin e masës së paraburgimit ndaj të pandehurit. Prokurori i çështjes, në bashkëpunim me Policinë e Kosovës, është duke zhvilluar veprime intensive në identifikimin e personave të tjerë të përfshirë në këtë rast.” – sqaroi Shala për KALLXO.com
Deputeti i Lëvizjes Vetëvendosje, Fahrush Rexhepi ishte marrë fizikisht nga protestuesit, ishte kapur e ishte kthyer mbrapsht në objektin e Kuvendit të Kosovës deri sa po provonte të largohej nga aty- gjatë protestës që mbajt rreth Kuvendit për t’u kërkuar të kalonte në lexim të dytë Projektligji për Dhomat e Specializuara.
Lidhur me këtë rast, Rexhepi kishte njoftuar se do ta procedojë në organet kompetente të rendit dhe drejtësisë rastin e sulmit fizik ndaj tij nga protestuesit e mbledhur para Kuvendit të Kosovës, të hënën, më 50.10.2026.
Përmes një reagimi, Rexhepi ka thënë se disa nga personat e identifikuar pas incidentit kanë kërkuar takim me të për t’i kërkuar falje, por siç ka deklaruar ai, kërkimfalja nuk e mbyll rastin.
“Edhe urdhërdhënësi i sulmit tash veç se dihet” – ka shkruar Rexhepi.
