Një shtetas i Kosovës është arrestuar në Selanik të Greqisë, në kuadër të një operacioni kundër trafikimit të narkotikëve, gjatë të cilit autoritetet greke kanë sekuestruar 324 kilogramë kanabis, transmeton KosovaPost.
Sipas njoftimit të Sistemit Prokurorial të Kosovës të datës 15.08.2026, në operacion janë arrestuar dy persona të dyshuar për trafikim me narkotikë, ndërsa në mesin e tyre ndodhet edhe shtetasi kosovar me inicialet A.I.
Operacioni thuhet se është zhvilluar pas një hetimi disamujor dhe bashkëpunimit ndërkombëtar ndërmjet Prokurorisë Speciale të Republikës së Kosovës, Policisë së Kosovës dhe autoriteteve të Maqedonisë së Veriut dhe Greqisë
“Prokuroria Speciale dhe Policia e Kosovës kanë kontribuar në këtë proces përmes veprimeve hetimore dhe shkëmbimit të informacionit me autoritetet partnere”- thuhet në njoftimin e lëshuar më 15.08.2026.
PSRK-ja ka bërë të ditur se bashkëpunimi me autoritetet ndërkombëtare do të vazhdojë, ndërsa institucionet do të ndërmarrin veprimet e nevojshme hetimore për zbardhjen e plotë të rastit.
