Një lajm befasues vjen nga Anglia: e ardhmja e Kevin De Bruyne mbetet e pasigurt dhe mes klubeve që po vëzhgojnë me interes situatën e mesfushorit belg është edhe Aston Villa. Sipas asaj që raporton ‘Sky Sports UK’, klubi nga Birminghami është duke menduar seriozisht të bëjë një goditje të madhe në merkato, duke e transferimin e De Bruyne-n në “Villa Park” për sezonin e ardhshëm.
De Bruyne, i cili ka gjasa të largohet nga Manchester City në fund të sezonit si lojtar i lirë, ka bërë së fundmi disa deklarata që hedhin dritë mbi situatën e tij. Në një intervistë për BBC, ai tha:
“Nuk kam marrë asnjë ofertë gjatë gjithë vitit. Ata thjesht morën një vendim. Sigurisht që u befasova pak, por duhet ta pranoj. Ende kam shumë për të dhënë”.
Belgu 32-vjeçar theksoi se nuk mendon ende për tërheqjen nga futbolli.
“E di që nuk jam më 25 vjeç, por ndiej se mund të bëj ende punën time. Jam i hapur për çdo mundësi. Duhet të marr në konsideratë sportin, familjen, gjithçka bashkë – atë që ka më shumë kuptim për mua dhe për familjen time. E dua futbollin. Më pëlqen të garoj. Kjo më shtyn përpara.”
Premier League, ende një opsion
Edhe pse ka pasur zëra për një transferim të mundshëm në SHBA apo në Arabinë Saudite, një qëndrim në Premier League nuk është përjashtuar. Aston Villa, e cila këtë sezon ka treguar ambicie serioze dhe synon të forcohet më tej për të garuar në nivelet më të larta, do të ishte një destinacion interesant për De Bruyne-n.
Nëse transferimi realizohet, ai do të ishte një nga goditjet më të mëdha të merkatos në Angli dhe do të përforconte ndjeshëm skuadrën e Unai Emery-t, duke sjellë përvojën dhe klasin e një prej mesfushorëve më të mirë të dekadës së fundit, s.n.
