Ambasadori i Kosovës në Gjermani, Faruk Ajeti, ka njoftuar se Adis Selimi, babai i të cilit është nga Mitrovica dhe nëna nga Bosnje e Hercegovina, i ka hyrë garës për deputet të Bundestagut gjerman nga partia SPD.
Ajeti tha se ai është një figurë premtuese në politikën gjermane dhe se ka ndërtuar “një karrierë të bujshme akademike” si bashkëpunëtor shkencor në Departamentin e Filozofisë të Universitetit Heinrich-Heine-Universität Düsseldorf.
“Takimin e parë të vitit 2025 e nisa me Adis Selimin, një figurë premtuese në politikën gjermane dhe kandidat për deputet në njësinë zgjedhore 106 (Düsseldorf II). I lindur në vitin 1994 në Unterbilk, Adisi vjen nga një familje e përzier – babanë nga Mitrovica dhe nënën nga Bosnja dhe Hercegovina. Përmes një angazhimi të vazhdueshëm në politikë, ai tashmë ka filluar të lërë gjurmë të rëndësishme në partinë SPD, nën siglën e të cilën kandidon për deputet”.
“Adisi ka ndërtuar një karrierë të bujshme akademike si bashkëpunëtor shkencor në Departamentin e Filozofisë të Universitetit Heinrich-Heine-Universität Düsseldorf. Në këtë universitet, ai ka përfunduar doktoratën e tij dhe vazhdon të ligjërojë, duke u bërë jo vetëm një nga ligjëruesit më të rinj në moshë, por edhe të kontribuojë me punime shkencore. Një bisedë me të është si një udhëtim intelektual mes filozofisë, politikës dhe vizionit të tij për rolin e Gjermanisë në Europë dhe në botë”, shkruan ambasadori në Facebook.
Ajeti tha se “rruga dhe arritjet e Adisit mishërojnë historinë e shumë të rinjve tanë në diasporë – njerëz që, me përkushtim dhe punë të palodhshme, shndërrohen në shembuj të jashtëzakonshëm të suksesit dhe frymëzim për brezat e ardhshëm”.
Ajeti kujtoi se në nëntor të vitit 2024, Arianit Besiri, po ashtu me prejardhje nga Mitrovica, bëri histori duke u bërë kryetari i parë i një komune në Gjermani me origjinë nga Kosova.
“Tani, Adisi gjendet para këtij shansi historik. Nëse arrin të fitojë në zgjedhjet federale të Bundestagut më 23 shkurt 2025, ky do të shënojë një moment të rëndësishëm – duke hapur një kapitull të ri të angazhimit edhe më të fuqishëm të mërgatës tonë në Gjermani. Suksese Adisit dhe të gjithë miqve të Kosovës që kandidojnë në zgjedhjet e ardhshme për Bundestagun gjerman!”.
