Me rastin e festës së 28 Nëntorit, pedagogu nga Universiteti i Tiranës, Evarist Beqiri, foli rreth vështirësive të shpalljes së pavarësisë së Shqipërisë.
Ismail Qemali ishte ai që ngriti flamurin në Vlorë duke shpallur Shqipërinë shtet sovran dhe të pavarur, e që sipas Beqirit, padyshim ai ishte njeriu i duhur, në kohën e duhur.
“Në momentin që e bëmë pavarësinë, e bëmë menjëherë dhe me shumë vështirësi. Pra, ishte një lindje e vështirë. Për shkak të rrethanave, Ismail Qemali, ishte njeriu i duhur, në momentin e duhur, në kohën e duhur. Ai kishte punuar për këtë ditë arriti ta realizonte me shumë sukses dhe jo rastësisht”, deklaroi Beqiri në emisionin “Infonata”.
Ndër të tjerash, Ismail Qemali është kryeministri dhe kryetari i parë në historinë e shtetit shqiptar, me ç’rast, Beqiri tha se momenti i dorëheqjes së tij nga posti i kryeministrit, është po aq i rëndësishëm sa momenti i shpalljes së pavarësisë.
Duke komentuar arsyen e dorëheqjes së tij, pedagogu vlerësoi që njëra na arsyet kryesore mund të jetë atdhe dashuria që ai kishte për Shqipërinë.
“Momenti i pavarësisë është shumë i rëndësishëm, ashtu siç është edhe momenti i dorëheqjes së tij. Menjëherë pas shpalljes së pavarësisë, ai donte ta reformonte Shqipërinë. Ai u mor edhe me ekonominë, filloi të themelonte bankën shqiptare. Nga ana tjetër u përpoq ta bënte edhe reformën agrare duke marrë toka që ishin jo të regjistruara dhe donte që t’ia shpërndante popullit. E me këto reforma prekeshin interesa, prandaj menjëherë pas shpalljes së pavarësisë filluan kundërshtime nga vetë shqiptarët, nga vetë klasa e pasanikëve, andaj kjo ishte një nga faktorët që ai u detyrua të jepte dorëheqjen, e këtë e bëri si një akt atdhe dashurie, për ta shpëtuar Shqipërinë”, potencoi Beqiri në Tëvë1.
Kujtojmë se Shqipëria sot feston 111-vjetorin e shpalljes së pavarësisë./t
