Valdete Daka ka qenë njëra prej gjyqtarëve të para që ka punuar në Gjykatën Komunale të Prizrenit, e më pas karriera e saj vazhdoi në drejtim të njëjtë derisa u emërua edhe Kryetare e Komisionit Qendror të Zgjedhjeve. Në të njëjtën periudhë, Daka është zgjedhur edhe gjykatëse në Gjykatën Supreme të Kosovës.
Të hënën në emisionin “LIBERO” ajo ishte e ftuar për të folur për karrierën e saj të bujshme në fushën e drejtësisë, por edhe për jetën e saj personale – jashtë asaj që e njohim të gjithë.
Derisa u pyet për procesin e vetingut që pritet të bëhet në sistemin e drejtësisë, ajo u shpreh kundër, derisa theksoi se janë duke u shfrytëzuar momentet politike.
“…Mendoj se ndonjëherë shfrytëzohen momentet politike dhe më së lehti është të merren me sistemin gjyqësor dhe prokurorial, sepse në njëfarë mënyre ne nuk kemi askënd që të na mbrojë (nuk kemi avokatë)…”,theksoi ajo, megjithëse tha se nuk e ka problem t’i nënshtrohet procesit të tillë.
Vlen të përmendet se në vitin 2021, Daka është shkarkuar nga posti i kryetares së KQZ-së nga kushërira e saj, presidentja e Kosovës, Vjosa Osmani.
“…Nuk e kam pritur që do të shkarkohem dhe do të akuzohem për çështje të cilat i ka vendosur KQZ-ja… Nuk ka qenë Valdete Daka ajo e cila ka marrë vendime, sepse KQZ-ja është institucion kolegjial me 11 anëtarë që janë me të drejtë vote dhe vendoset me shumicë…”, tha Daka.
Gjithashtu, ajo përmendi se është kërkuar nga ajo që të japë dorëheqje, mirëpo nuk e pranoi, meqenëse sipas saj nuk kishte asnjë arsye për ta bërë një veprim të tillë, dhe me Vjosa Osmanin u shpreh (ende) e zhgenjyer dhe tha se nuk e ka takuar dhe nuk do ta takojë më.
“…Përderisa nuk kam gabuar dhe nuk kam bërë diçka të jashtëligjshme, kam konsideruar se ka qenë jo e hijshme që të kërkohet dorëheqje nga unë…Në momentin që jep dorëheqje i bie që e ndjen veten fajtor për diçka dhe unë nuk e kam ndier veten fajtore… Nuk e kam takuar Vjosa Osmanin dhe nuk do ta takojë më…”, deklaroi Daka.
Për ta shikuar intervistën e plotë të Valdete Dakës, klikoni në linkun e mëposhtëm:
