Dejona Mihajli ka reaguar ndaj kërkesës së PDK-së dhe LDK-së për votat e shumicës për nënkryetarët e Kuvendit, duke thënë se nuk mund të kërkohen votat e 62 deputetëve për këto pozita, ndërsa në të njëjtën kohë bllokohet zgjedhja e Presidentit, përcjell Kosova Post.
“Pse duhet që 62 deputetë ta votojnë kandidaten e PDK-së për nënkryetare të Kuvendit, kur PDK-ja deklaron se nuk do të marrë pjesë në zgjedhjen e Presidentit në asnjë formë – as në bisedime, as në takime, as me prani në sallë?”, ka deklaruar Mihajli.
Ajo e ka lidhur këtë qëndrim edhe me votimin e PDK-së kundër kandidates së shumicës për Kryetare të Kuvendit.
Sipas Mihajlit, e njëjta logjikë vlen edhe për LDK-në.
“Pse duhet që 62 deputetë ta votojnë kandidatin e saj për nënkryetar, kur ai është pozicionuar haptazi kundër çdo marrëveshjeje me Lëvizjen VETËVENDOSJE! për zgjidhjen e ngërçit dhe zgjedhjen e Presidentit?”, ka pyetur ajo.
Mihajli ka theksuar se pozita e nënkryetarit të Kuvendit nuk duhet të shihet si një privilegj i garantuar nga votat e shumicës, pa një përgjegjësi për funksionimin e institucioneve.
“Nuk mund të kërkosh votat e shumicës për t’u ulur në Kryesinë e Kuvendit dhe, sapo ta marrësh pozitën, ta përdorësh mungesën nga salla për ta pamundësuar zgjedhjen e Presidentit dhe për ta çuar vendin përsëri në zgjedhje”, është shprehur ajo.
Sipas saj, çdo marrëveshje për zgjedhjen e nënkryetarëve duhet të jetë pjesë e një dakordimi më të gjerë për funksionimin e institucioneve të Republikës.
“Nëse kërkojnë marrëveshje e votë për nënkryetarët e Kuvendit, duhet të pranojnë marrëveshje për funksionimin e institucioneve në tërësi”, ka deklaruar Mihajli.
Në përfundim, ajo ka argumentuar se nuk mund të ketë, siç e cilëson, marrëveshje vetëm për pozitat e partive politike, ndërsa institucionet e tjera mbeten të bllokuara.
“Sepse nuk mund të ketë marrëveshje vetëm për postet e tyre dhe bllokadë për institucionet e Republikës, siç është Presidenti, duke i çuar qytetarët drejt zgjedhjeve të përsëritura”, ka përfunduar Mihajli.
