Deputeti i Lëvizjes Vetëvendosje (LVV), Enver Dugolli, ka folur për procesin e zgjedhjes së presidentit të ri të Kosovës, duke theksuar se pas miratimit të buxhetit të hënën, pritet të hapet diskutimi për këtë çështje.
Dugolli deklaroi se tashmë ka sinjale pozitive nga partitë opozitare, duke treguar një qasje pragmatike që ndryshon nga bllokadat e kaluara.
Ai theksoi se nuk ka ende kandidaturë definitive që LVV do të përkrahë, për të mos dërguar mesazh se po tenton të imponojë dikë.
Ai tha se synimi i LVV-së është arritja e një konsensusi me mirëkuptim për të shmangur zgjedhje të reja.
“Nuk ka ende një kandidaturë definitive që do ta përkrahim, për shkak se nuk po dëshirojmë që partitë opozitare ta marrin si sinjal që po dëshirojmë ta imponojmë dikë. Synojmë që ta arrijmë një konsensus me mirëkuptim që për të mos dërguar vendin në zgjedhje të reja. Mund të ketë emër tjetër, përveç të Vjosa Osmanit. Nuk mund të paragjykojmë. I kemi vetëm 66 vota, nuk i kemi mbi 80 që t’ia sigurojmë Vjosa Osmanit. Na mbetet të gjithëve që t’ia sigurojmë”, deklaroi ai në Tëvë1.
Ai gjithashtu komentoi spekulimet rreth kandidaturës së Ramush Haradinajt, duke thënë se ky i fundit vetë e ka hequr dorë nga pretendimi për postin e presidentit dhe se PDK e LDK nuk kanë shfaqur interesim.
“Haradinaj, vetë e deklaroi se nuk do të jetë kandidat për president, ndonëse ka pas fjalë e spekulime që po kërkon. Si duket PDK e LDK nuk kanë pasur interesim, prandaj me sa e kuptova Haradinaj, veçse ka hequr dorë nga ai pretendim. Të shohim, zhvillimet e ardhshme siç po ndodhin, asgjë nuk përjashtohet. Pra, gjithçka është e hapur ende.
Porse i pyetur se për të mos shkuar vendi në zgjedhje, a është zgjidhje Haradinaj, ai tha se nuk përjashtohet askush.
“Zgjidhja e këtij posti të lartë shtetëror është zgjidhje për të mos shkuar në zgjedhje – nuk po përjashtoj askënd”, deklaroi Dugolli.
