Deputetja e pavarur në Kuvendin e Shqipërisë, Marjan Koçeku, ka kritikuar qeverinë shqiptare për mungesën e vëmendjes ndaj shqiptarëve në Serbi.
Përmes një postimi në Facebook, Koçeku ka thënë se zhvillimet e ditëve të fundit kanë lënë në hije një ngjarje që, sipas saj, përbën lajmin kryesor: bashkimin e tetë subjekteve politike shqiptare në Serbi në një listë të përbashkët.
Ajo ka shkruar se “Koalicioni Shqiptar” do të garojë në zgjedhjet parlamentare të 25 tetorit në Serbi, duke e cilësuar këtë bashkim si një zhvillim të rëndësishëm për përfaqësimin politik të shqiptarëve atje.
Sipas Koçekut, këto zgjedhje vijnë pas disa muajsh protestash dhe shqiptarët në Serbi i gjejnë ato “ma të bashkuem”.
Deputetja ka kritikuar edhe qeverinë shqiptare, duke thënë se ajo nuk ka reaguar dhe as nuk e ka mbështetur një akt të tillë politik.
“Rrallëherë ngrihet çështja e tyne edhe në takime të diplomacisë shqiptare”, ka shkruar Koçeku, duke pretenduar se shqiptarët në Serbi nuk marrin mbështetjen e duhur nga qeveria e Shqipërisë.
Ajo ka përmendur në këtë kontekst edhe mbështetjen financiare të Qeverisë së Kosovës për shqiptarët në Serbi, duke thënë se kjo mbështetje është rritur çdo vit me nga një milion euro.
Në fund të reagimit të saj, Koçeku ka ngritur një pyetje për qeverinë shqiptare: “Po qeveria jonë, interesat e kujt mbron atje?
