Dhomat e Specializuara të Kosovës kanë vlerësuar se pjesëmarrja e tyre në tryezën e rrumbullakët të organizuar nga Avokati i Popullit, Naim Qelaj, nuk është e përshtatshme. Takimi kishte për qëllim diskutimin e gjetjeve dhe rekomandimeve të Qelajt lidhur me këtë institucion dhe Zyrën e Prokurorit të Specializuar.
Përmes një komunikate, Dhomat e Specializuara kanë sqaruar se vendimi për të mos marrë pjesë bazohet në dispozitat kushtetuese dhe ligjore që përcaktojnë mandatin e tyre.
Sipas institucionit, Kushtetuta e Kosovës, përkatësisht neni 162, paragrafi 11, si dhe neni 34, paragrafi 9, i Ligjit për Dhomat e Specializuara dhe Zyrën e Prokurorit të Specializuar, përcaktojnë se përgjegjësia për mbrojtjen e të drejtave dhe lirive themelore të personave që kanë kontakte me këto institucione i takon Avokatit të Popullit të Dhomave të Specializuara, Pietro Spera.
Në këtë kontekst, Dhomat kanë rikujtuar se çështja e mungesës së kompetencave të Avokatit të Popullit të Kosovës, Naim Qelaj, për të vepruar në raport me to, i është bërë e ditur atij edhe më parë.
Komunikata i referohet edhe rolit të Komitetit Ndërkombëtar të Kryqit të Kuq, i cili, sipas Dhomave të Specializuara, kryen mbikëqyrjen dhe inspektimin e objektit të paraburgimit, me qëllim të sigurimit të respektimit të standardeve më të larta ndërkombëtare.
Sa u përket procedurave gjyqësore, Dhomat kanë theksuar se vendimet, urdhrat dhe aktgjykimet nxirren nga gjyqtarë të pavarur dhe të paanshëm, në përputhje me standardet evropiane dhe ndërkombëtare për të drejtat e njeriut.
Ato kanë shtuar se palët që kanë kundërshtuar vendimet gjyqësore kanë mundur të shfrytëzojnë mekanizmat ligjorë në dispozicion, përfshirë ankesat në Panelin e Apelit, Gjykatën Supreme dhe Gjykatën Kushtetuese të Dhomave të Specializuara.
Në përfundim, Dhomat e Specializuara kanë ritheksuar se vazhdojnë të përqendrohen në përmbushjen e mandatit të tyre për mbrojtjen e të drejtave dhe lirive themelore, si dhe për zhvillimin e proceseve penale të pavarura, të paanshme, të drejta dhe efikase.
