Dogana e Kosovës dhe Policia e Kosovës kanë parandaluar dy raste të dyshuara të kontrabandimit të mallrave përmes rrugëve ilegale në zonën e Zubin Potokut, transmeton KosovaPost.
Sipas njoftimit të Doganës, sot rreth orës 08:00, autoritetet kanë pranuar informacion për dy automjete që dyshohej se do të hynin nga territori i Serbisë në Kosovë përmes rrugëve ilegale.
Njësitë e Doganës dhe Policisë kanë koordinuar veprimet dhe janë pozicionuar në disa pika për identifikimin dhe ndalimin e automjeteve.
Rreth orës 09:00, dy automjetet janë identifikuar duke lëvizur në drejtim të Mitrovicës, ndërsa më pas kanë devijuar nga rruga kryesore dhe kanë vazhduar drejt fshatit Varagë.
“Me të vërejtur praninë e zyrtarëve, drejtuesit e automjeteve kanë devijuar nga rruga dhe janë ndalur në oborrin e një shtëpie, prej nga kanë tentuar të largohen në këmbë në drejtim të arave”, thuhet në njoftimin e Doganës.
Pas ndjekjes, zyrtarët kanë arritur ta ndalojnë njërin prej personave të dyshuar, ndërsa personi tjetër është larguar dhe mbetet ende i paidentifikuar.
Të dy automjetet janë dërguar në Terminalin Doganor, ku gjatë kontrollit janë gjetur mallra të kontrabanduara, kryesisht produkte ushqimore, produkte higjienike dhe birra të llojeve të ndryshme.
“Mallrat dhe automjetet janë ndaluar dhe janë dorëzuar në depon përkatëse të Doganës së Kosovës”, thuhet më tej në komunikatë.
Për rastet janë lëshuar dokumentet zyrtare për konfiskimin e mallrave dhe ndalimin e automjeteve, përfshirë edhe dokumentacionin në mungesë ndaj personit që ende nuk është identifikuar.
Dogana bën të ditur se rasti po trajtohet nga strukturat kompetente, në koordinim me njësitë hetimore, për dokumentimin e plotë dhe ndërmarrjen e procedurave të mëtejshme ligjore.
“Bashkëpunimi dhe koordinimi i vazhdueshëm me Policinë e Kosovës mundësoi parandalimin e futjes së mallrave përmes rrugëve ilegale dhe goditjen e kontrabandës”, thuhet në fund të njoftimit.
