Shkruan: Sead Zimeri
Disa njerëz mendojnë se duhet, për shembull, të lexoni, sepse nëse nuk lexoni, vlera juaj shoqërore do të jetë më e ulët se ajo e bashkatdhetarëve tuaj. Pra, leximi perceptohet si një mënyrë për të shkëlqyer në shoqëri, për të krijuar një emër për veten.
Por, kjo është mënyra e gabuar e kundrimit të leximit apo, në të vërtetë, çfarëdo aktiviteti tjetër, intelektual apo artistik, që bëni. Mënyra e duhur është ta shikoni leximin ose aktivitetet e tjera si aktivitete që përmirësojnë dhe rrisin aftësitë tuaja dhe thellojnë përvojën tuaj të jetës. Duhet të lexoni jo sepse të tjerët po lexojnë, jo sepse shoqëria i shikon me përçmim ata që nuk lexojnë, jo sepse nuk do të fitoni respektin e të tjerëve, e kështu me radhë.
Përkundrazi, duhet të lexoni sepse duke lexuar, zhvilloni aftësitë tuaja intelektuale dhe imagjinative, të cilat ua mundësojnë që ta përjetoni jetën tuaj shumë më thellë sesa duke mos i zhvilluar këto aftësi. Vetëm duke i zhvilluar këto aftësi e përjetoni jetën në të gjitha madhësitë dhe thellësitë e saj.
Po flas për leximin si shembull, por kjo vlen njëlloj edhe për ushtrimet ose ecjen në natyrë ose për çdo gjë që e bën jetën tuaj më të mirë. Jo më mirë për sa i përket statusit social, sepse mund të keni një status të lartë shoqëror, por të mos arrini ta shijoni jetën.
Prandaj duhet të keni perspektivën e duhur për jetën; dmth, duhet ta shikoni jetën nga perspektiva e jetës. Nuk ka rëndësi nëse keni një status të lartë apo të ulët shoqëror. Rëndësi ka nëse e përjetoni jetën në të gjitha mundësitë që ju ofron. Pra, zhvillimi i intelektit është një mënyrë për ta përmirësuar përvojën tuaj të jetës, ashtu si rritja e aftësive të trupit tuaj është një mënyrë për ta përmirësuar përvojën tuaj të jetës.
Pra, mos e bëni sepse e bëjnë të tjerët. Bëjeni sepse jeni gjallë dhe nuk duhet ta harxhoni jetën kot; nuk duhet ta kaloni këtë jetë pa e shijuar thellë. Pra, zhvilloni aftësitë tuaja intelektuale, imagjinative, artistike dhe trupore në mënyrë që ta shijoni më shumë jetën tuaj.