Nga data 24 deri më 26 prill 2025, rreth 30 çiklistë nga Kosova, nën organizimin e Klubit të Çiklizmit Pro Bike Prizren, morën pjesë në projektin “Dy Pedale, Një Mijë Kujtime: Marshimi me Biçikletë në Çanakkale për Nder të Dëshmorëve”, përcjell Kosova Post.
Projekti u realizua me mbështetjen e Institutit Yunus Emre –Qendra Kulturore Turke në Kosovë, Drejtoria e Zonës Historike të Betejave të Çanakalasë dhe Gadishullit të Galipolit, si dhe me kontirbutet e Platformës së Çiklizmit të Çanakalasë (ÇABİP).Gjatë këtij marshimi përkujtimor, çiklistët morën pjesë në Marshin e Nderit të Batalionit të 57-të dhe
vizituan vendet historike më të rëndësishme si: Memoriali i Dëshmorëve të Çanakalasë, Conkbayırı, Muzeu 3D i Luftës, Varrezat e Dëshmorëve në Alçıtepe, Kalanë e Kilitbahirit, Monumentin e Seyit Onbaşı-t, Pazarin Aynalı dhe Qytetin Antik të Trojës.
Në kuadër të ceremonive përkujtimore, çiklistët u pritën nga Prefekti i Çanakalasë, z. Doç. Dr. Ömer Toraman dhe Drejtori i Zonës Historike të Betejave të Galipolit, z. İsmail Kaşdemir, të cilëve iu dorëzuan pllakat mirënjohjeje në shenjë falënderimi për mbështetjen e dhënë ndaj këtij projekti.
Koordinatori i Institutit Yunus Emre në Prishtinë, z. Ramazan Yılmaz, në lidhje me projektin deklaroi:
“Me këtë aktivitet simbolik nuk bëmë thjesht një marshim me biçikleta, por përjetuam historinë tonë të përbashkët, nderuam kujtimin e dëshmorëve dhe forcuam edhe një herë lidhjet e miqësisë mes Kosovës dhe Turqisë. Jemi krenarë që bashkë me të rinjtë tanë arrijmë të mbajmë gjallë frymën e Çanakalasë dhe ta përcjellim këtë trashëgimi brezave të ardhshëm.”
Ky projekt kishte për qëllim të rikujtojë sakrificën e mijëra vullnetarëve nga Ballkani që morën pjesë në Luftën e Çanakalasë, të forcojë lidhjet historike dhe kulturore mes Kosovës dhe Turqisë, si dhe të
mbajë të gjallë kujtesën e përbashkët të sakrificës për liri. Me përkushtimin dhe bashkëpunimin e të gjitha palëve të përfshira, ky marshim tre-ditor u shndërrua në një dëshmi të fuqishme të ruajtjes së trashëgimisë historike dhe forcimit të miqësisë ndërmjet dy popujve./Kosova Post/
