Të ecurit është i dobishëm për shëndetin, kjo është tashmë e provuar, dhe nuk është e nevojshme të bëhen kilometra të shumtë për të parë përfitimet: mjaftojnë vetëm 150 minuta në javë aktivitet fizik, duke përfshirë ecjen, për të ruajtur shëndetin, sipas Organizatës Botërore të Shëndetësisë.
Ecja na ndihmon të djegim kalori dhe të mbajmë nën kontroll peshën trupore, përmirëson qëndrimin dhe ekuilibrin tonë, ka efekte pozitive në qarkullimin e gjakut dhe shëndetin e zemrës, si dhe ndihmon lëvizjen e zorrëve. Gjithashtu, ecja mund të jetë një ilaç natyral kundër çrregullimeve depresive, siç është konfirmuar nga një studim i sapopublikuar.
Sa më shumë ecën, aq më pak rrezikon të biesh në depresion: e thotë shkenca
Duke analizuar 33 studime të kryera gjatë viteve të fundit mbi një total prej 96,173 të rriturish, një grup studiuesish të udhëhequr nga Bruno Bizzozero-Peroni nga Universidad de Castilla-La Mancha në Spanjë ka arritur në përfundimin se sa më shumë hapa të bësh çdo ditë, aq më pak rrezikon të vuash nga çrregullime depresive.
Përfundimet e kësaj meta-analize, të publikuara në Jama Network Open, përcaktojnë gjithashtu numrin e hapave që duhen bërë çdo ditë për të ulur rrezikun e simptomave depresive: një numër ditor hapash i barabartë ose më i madh se 7,000 është lidhur me një rrezik të reduktuar për depresion me 33%. Megjithatë, është e mjaftueshme të kalosh 5,000 hapa në ditë për të pasur përfitime.
Përfitimet e 10,000 hapave në ditë
Sipas studiuesve, objektivi ideal është të arrihen 10,000 hapa në ditë. Të rriturit që bëjnë më shumë se 10,000 hapa në ditë tregojnë shkallën më të ulët të zhvillimit të simptomave depresive. Por edhe arritja e kufirit prej 7,500 hapash në ditë është lidhur me një rrezik për depresion të reduktuar me 42% në krahasim me ata që jetojnë një jetë sedentare ose nuk arrijnë 5,000 hapa në ditë.
Si të arrini 7,000 hapa në ditë?
Studiuesit kanë përfshirë në përfundimet e tyre disa sugjerime për të arritur objektivin e ecjes pa shumë vështirësi:
Bëni ecje 10-minutëshe pas vakteve ose gjatë pushimeve nga puna.
Parkoni makinën në një distancë më të madhe nga destinacioni.
Zgjidhni shkallët në vend të ashensorit sa herë të jetë e mundur.
Gjeni shokë për ecje, qofshin familjarë, miq apo fqinj, për t’u motivuar së bashku të dilni për të ecur.s.n.
