Deputeti holandez i Parlamentit Europian, Thijs Reuten, kritikoi ashpër presidentin e Serbisë, Aleksandar Vuçiq, që refuzoi të nënshkruante propozimin europian për normalizimin e marrëdhënieve me Kosovën.
Ai e konsideron këtë qëndrim të Vuçiqit zhgënjyes dhe të pritshëm.
“Refuzimi i turpshëm i Vuçiçit për të nënshkruar marrëveshjen e normalizimit me Republikën e Kosovës, të cilën ai ‘e pranoi’ të hënën, sugjeron qartësisht se Serbia po luan me kohën. Metodat e buta duhet të marrin fund. Karrotat kanë dështuar. Nxirrni shkopinjtë”, shkruan eurodeputeti në profilin e tij në Twitter.
Ndërkohë, edhe më herët, ligjvënësit holandezë kanë kërkuar dënimin e Serbisë për qasjen agresive ndaj Kosovës dhe për mos-dënimin e luftës së Rusisë në Ukrainë përmes sanksioneve.
Madje është kërkuar që Serbisë t’i ndalohet anëtarësimi në BE dhe t’i rikthehet regjimi i vizave.
Ndryshe, kryeministri i Kosovës, Albin Kurti, dhe presidenti i Serbisë, Aleksandar Vuçiq, ranë dakord të hënën se nuk ka nevojë për diskutime të mëtejme rreth propozimit të Bashkimit Evropian për normalizimin e marrëdhënieve mes tyre, tha shefi i politikës së jashtme të BE-së, Josep Borrell.
Borrell dhe i dërguari i BE-së për dialogun Kosovë-Serbi, Mirosllav Lajçak, pritën të hënën në Bruksel udhëheqësit e këtyre dy vendeve.
Në tryezën e bisedimeve ishte propozimi i BE-së, i titulluar “Marrëveshje drejt normalizimit mes Kosovës dhe Serbisë”.
Në deklaratën e lëshuar pas takimit, Borrell tha se palët shprehën gatishmërinë e tyre për të vazhduar me zbatimin e kësaj marrëveshjeje.
“Nevojiten negociata të mëtejshme për të përcaktuar modalitetet specifike të zbatimit të dispozitave”, tha Borrell, duke paralajmëruar takimin e radhës mes Kurtit dhe Vuçiqit në muajin mars.
As disappointing as it is unsurprising.
Vučić’s shameful refusal to sign the normalization agreement with Republic of Kosovo, which he ‘accepted’ on Monday, clearly suggests Serbia is just playing for time. Again.
Appeasement must end. Carrots have failed. Take out the sticks. pic.twitter.com/1NThLVShsn
— Thijs Reuten 🇪🇺🌹 (@thijsreuten) March 1, 2023
