Punëtorët dhe sindikatat e tyre në Francë po përgatiten të dalin në rrugë sot në një raund të ri protestash kundër planit të reformës së pensioneve të qeverisë, raporton Anadolu.
Franca pati një javë të ngarkuar me greva dhe protesta mbarëkombëtare më 7, 8 dhe 9 mars, me mijëra njerëz që kundërshtuan planin e propozuar, i cili shkaktoi zemërim menjëherë pasi u shpall vitin e kaluar.
Sindikatat kanë bërë thirrje për një grevë mbarëkombëtare sot për herë të shtatë që nga janari, ndërsa Senati është ende duke debatuar mbi planin e reformës. Afati i fundit i debatit është të dielën në mesnatë.
Inteligjenca franceze pret mes 800 mijë dhe një milion protestues sot, sipas transmetuesit lokal BFMTV.
Vetëm në Parisi pritet të ketë deri në 100 mijë protestues, shtoi i njëjti burim.
Në vazhdën e protestave, Senati debatoi mbi projektligjin dhe të mërkurën në mbrëmje votoi me 201 pro dhe 115 kundër për pikën më të diskutueshme – nenin 7 që rrit moshën e daljes në pension nga 62 në 64 deri në vitin 2030.
Sindikatat të martën kërkuan gjithashtu që të priten “urgjentisht” nga presidenti Emmanuel Macron, por udhëheqësi francez të premten e refuzoi hapur kërkesën në një letër, mirëpo tha se nuk e nënvlerëson pakënaqësinë e njerëzve.
Presidenti ftoi sindikatat të respektojnë procesin parlamentar.
“Qeveria është, si gjithmonë, e lidhur me ju për të përparuar në dialog”, ka thënë Macron, sipas BFMTV-së.
Kompania kombëtare hekurudhore SNCF ka thënë më parë se do të vazhdojë të përballet me ndërprerje në fundjavë për shkak të grevave të zgjatura të punëtorëve të tyre dhe deri në 20 për qind e fluturimeve do të anulohen gjatë fundjavës në disa aeroporte për të njëjtën arsye, sipas Drejtorisë së Përgjithshme për Aviacionin Civil.
Planet e kundërshtuara kryesisht përfshijnë rritjen e moshës së daljes në pension nga 62 në 64 deri në vitin 2030 dhe kërkimin e të paktën 43 vitesh punë për t’u kualifikuar për pensione të plota.
