Ministrja e Punëve të Jashtme dhe Diasporës, znj. Donika Gërvalla, ka reaguar fuqishëm përmes një postimi publik në mbrojtje të ministrit të Bujqësisë, z. Faton Peci, duke e cilësuar atë si një prej figurave më të ndershme dhe të përkushtuara të qeverisë Kurti, përcjell KosovaPost.
Gërvalla theksoi se ministri Peci është “punëtor i madh, i ndershëm deri në palcë, i guximshëm si rrallë kush, i ditur, i edukuar, plot integritet dhe dinjitet”. Sipas saj, sulmet sistematike kundër ministrit Peci janë fushata të mirëorkestruara nga rrjete të krimit të organizuar dhe interesa të lidhura me disa media, të cilat ajo i cilësoi si jo-gazetareske.
“Fushatat e orkestruara dhe sistematike të muajve të fundit kundër Fatonit, para dhe pas zgjedhjeve të 9 shkurtit, janë produkt i krimit të organizuar dhe përfaqësuesve e pronarëve të bizneseve mediatike, që veç gazetarë nuk janë,” tha Gërvalla.
Ajo shtoi se përpjekjet për njollosjen e ministrit janë të kota, pasi qytetarët e Kosovës e kanë njohur dhe vlerësuar punën e tij, duke e vendosur atë ndër më të votuarit në vend. Ministrja Gërvalla ritheksoi përkushtimin e institucioneve ndaj punës me ndershmëri dhe integritet, pavarësisht sulmeve të jashtme.
“Nuk ka fushatë njollosëse, nuk ka kërcënim e as sulm që na ndal. Ju, që veç gazetarë nuk jeni, vazhdoni me gënjeshtra e sajime, e ne po vazhdojmë me punët e shumta që kemi përpara, me nder, dinjitet e integritet,” përfundon postimi i saj.
Ky reagim publik nga një prej zyrtareve më të larta të shtetit vjen si mbështetje e fuqishme për një nga ministrat më të zëshëm dhe më të votuar të kabinetit aktual, në një kohë kur sulmet dhe dezinformimi vazhdojnë të sfidojnë integritetin e institucioneve në Kosovë.
