Zbulimi i mbetjeve mortore në Zubin Potok dhe ai i një arsenali armësh ka rikthyer në fokus hetimin e krimeve të luftës dhe çështjet e sigurisë në veri të Kosovës. Ekspertët vlerësojnë se institucionet kosovare kanë kapacitet për menaxhimin e kërcënimeve të sigurisë.
Në tokën e Zubin Potokut, historia e luftës po nxjerr gjurmë të reja, e dëshmi për krimet serbe ndaj popullsisë shqiptare.
Arsenali i armëve, municionit, pajisjeve ushtarake e dëshmi të tjera të gjetura atje, rihapin debatin për rolin e Serbisë në furnizimin me armatim të strukturave serbe në Kosovë, si dhe tendencat e saj destabilizuese.
Autoritetet kosovare kanë ngritur dyshime se armët e gjetura së fundmi mund të jenë përdorur për vrasjen e 23 personave, mbetjet kockore të të cilëve u gjetën ditë më parë.
Por ekzistenca e sasive të tilla të armatimit ngre dyshime për mënyrën se si janë siguruar, kush i ka ruajtur dhe nëse pas tyre ka pasur mbështetje nga struktura jashtë Kosovës.
“Strategjia serbe konsiston në një kombinim metodash dhe taktikash hibride, që kanë për qëllim destabilizimin e vendit duke instrumentalizuar komunitetin serb në Kosovë, me qëllim që t’i përdorë vazhdimisht ata në betejën kundër Kosovës”, tha për RTK, Arben Fetoshi, drejtuesi i Institutit Octopus.
Por Fetoshi thotë se institucionet vendore po arrijnë të neutralizojnë me sukses kërcënimet serbe.
“Rreziku gjithmonë është evident, ndonëse kapacitetet e institucioneve tona të sigurisë kanë treguar që konsistojnë vazhdimisht në neutralizimin me sukses të këtyre kërcënimeve, mbi bazën e një koordinimi të vazhdueshëm me partnerët tanë strategjikë, për garantimin e sigurisë në të gjithë territorin e vendit”, tha Arben Fetoshi.
Mbetjet mortore të gjetura së fundmi si dhe armët e fshehura, rikthejnë thirrjet për reagim më të fuqishëm ndërkombëtar.
“Institucionet tona po punojnë sa po mundën, po pa lejen e prokurorëve të institucioneve ndërkombëtare është e kot, pa i hapë arkivat e Beogradit, nuk mundën institucionet tona me bë kurrgjë”, tha Gjyle Haziri nga shoqata “Zëri i Prindërve”.
“Është tepër e rëndësishme me i hedhë dritë asaj që ka ndodhë, sepse ju e dini që ne ende sot po gjejmë trupa. Domethënë, ende nuk i kemi edhe 1600 trupa të qytetarëve të vendit tonë, të cilëve s’kemi ku me ua vendos një lule në përvjetorin e rënies së tyre”, Gazmend Syla nga OVL-UÇK.
Qindra armë, mitraloza, mjete shpërthyese, granata dore, detonatorë dhe pajisje te tjera ushtarake u sekuestruan përreth tri lokacioneve në Zubin-Potok, ku së fundmi u zbuluan varreza masive.
Institucionet vendore janë zotuar se do të kërkohen përgjigje për të dëshmuar krimet e luftës, e bashkë me to, do të vazhdoje të sigurohet sundimi i ligjit në çdo cep të vendit.
