Ushtruesja e detyrës së Presidentes së Kosovës, Albulena Haxhiu, ka mirëpritur marrëveshjen e tetë subjekteve politike shqiptare në Luginën e Preshevës për krijimin e listës së përbashkët “Koalicioni Shqiptar” për zgjedhjet parlamentare në Serbi, të parapara të mbahen më 25 tetor.
Përmes një postimi në Facebook, Haxhiu e ka cilësuar bashkimin e subjekteve politike si një vendim të rëndësishëm për përfaqësimin politik të shqiptarëve në Preshevë, Bujanoc dhe Medvegjë.
“Ky është një vendim i pjekur politik, që e vendos përfaqësimin e shqiptarëve të Preshevës, Bujanocit dhe Medvegjës mbi çdo llogari partiake”, ka shkruar Haxhiu, duke përgëzuar drejtuesit e subjekteve politike për arritjen e marrëveshjes.
Ajo ka theksuar se rëndësia e këtij bashkimi, sipas saj, duhet parë edhe në kontekstin e shqetësimeve që lidhen me të drejtat e shqiptarëve në Serbi. Ndër çështjet e përmendura nga Haxhiu janë pasivizimi i adresave, mosnjohja e diplomave, përfaqësimi në institucionet publike, si dhe çështjet që lidhen me arsimin, përdorimin e gjuhës dhe simboleve dhe zhvillimin ekonomik.
Haxhiu ka bërë gjithashtu një krahasim me pozitën kushtetuese të komunitetit serb në Kosovë, duke theksuar se komuniteti serb ka 10 ulëse të rezervuara në Kuvend, një nënkryetar të Kuvendit dhe së paku një ministër në Qeveri.
“Në këto rrethana, bashkimi është i domosdoshëm. Ndarja e votave mund ta dobësojë përfaqësimin e Luginës, ndërsa një listë e përbashkët e forcon atë”, ka deklaruar ajo.
Ushtruesja e detyrës së Presidentes ka bërë të ditur se institucionet e Kosovës do të vazhdojnë të ngrenë çështjen e të drejtave të shqiptarëve në Serbi dhe të shtojnë, siç ka thënë ajo, mbështetjen institucionale për ta.
Në fund, Haxhiu u ka uruar sukses kandidatëve të listës së përbashkët në zgjedhjet e 25 tetorit, duke theksuar rëndësinë e pjesëmarrjes së shqiptarëve të Luginës në procesin zgjedhor.
