Kryetarja e Kuvendit të Kosovës, Albulena Haxhiu, ka bërë homazhe për dëshmorin Idriz Rrecaj, mbetjet mortore të të cilit u gjetën në një varrezë masive në Zubin Potok, përcjell KosovaPost.
Përmes një postimi në Facebook, Haxhiu ka thënë se, pas një pritjeje të gjatë dhe të dhimbshme, Rrecaj tashmë do të prehet në paqe pranë familjes së tij, në Skenderaj.
Ajo ka kujtuar se Idriz Rrecaj ishte një nga anëtarët e “Grupit të Intelektualëve”, duke theksuar se sakrifica e tyre për lirinë e Kosovës nuk do të harrohet.
“Sakrifica e Idrizit dhe e veprimtarëve të ‘Grupit të Intelektualëve’ për një Kosovë të lirë, që e shkruan vetë fatin e saj, nuk do të harrohet kurrë”, ka shkruar Haxhiu.
Ajo ka vlerësuar se gjetja e mbetjeve mortore dhe rivarrimi i Rrecajt përbëjnë një hap drejt drejtësisë dhe një ngushëllim për familjen e tij, e cila priti për shumë vite për të mësuar fatin e më të dashurit të tyre.
Megjithatë, Haxhiu ka theksuar se dhimbja mbetet për familjet që ende nuk kanë marrë përgjigje për fatin e të afërmve të zhdukur me dhunë, duke nënvizuar se kërkimet duhet të vazhdojnë deri në zbardhjen e fatit të secilit prej tyre.
Në fund të mesazhit, ajo ka nderuar jetën dhe veprën e Idriz Rrecajt.
“Lavdi jetës dhe veprës së heroit Idriz Rrecaj! Qoftë i përjetshëm kujtimi për të”, ka përfunduar Haxhiu.
