Kryetarja e Kuvendit të Kosovës, Albulena Haxhiu, ka marrë pjesë në pritjen e organizuar nga Ambasada Gjermane në Kosovë me rastin e Ditës së Bashkimit të Gjermanisë, përcjell KosovaPost.
Haxhiu ka thënë se kjo ditë mbart shpresën e një prej kthesave më të mëdha të historisë evropiane, duke theksuar se bashkimi u mundësoi njerëzve të takoheshin sërish pa pengesa dhe të ndërtonin jetën e tyre në liri.
“Për ne në Kosovë, miqësia me Gjermaninë ka edhe ngrohtësinë e kujtimeve familjare. Ajo ruhet në rrëfimet e njerëzve që gjetën atje një derë të hapur në kohët tona më të vështira, në mirënjohjen për ndihmën në rindërtimin e vendit dhe për mbështetjen e pavarësisë sonë”, ka shkruar Haxhiu.
Ajo ka përmendur edhe kontributin e komunitetit shqiptar në Gjermani në forcimin e marrëdhënieve mes dy vendeve.
Në këtë mbrëmje, Haxhiu ka thënë se ka ndarë edhe gëzimin për zgjedhjen e Presidentes së re, Justina Shiroka-Pula, si dhe për mundësinë e avancimit të Kosovës me stabilitet institucional.
“Me krenari fola edhe për përfaqësimin e grave në drejtimin e shtetit tonë, një arritje që na ngarkon me përgjegjësinë për t’u hapur rrugë grave të tjera”, ka deklaruar ajo.
Haxhiu ka shprehur mirënjohje ndaj Gjermanisë për miqësinë dhe përkrahjen e saj në rrugën evropiane të Kosovës.
“Gëzuar Ditën e Bashkimit të Gjermanisë! Uroj që afërsia ndërmjet njerëzve tanë të vazhdojë t’i japë forcë miqësisë ndërmjet dy shteteve tona”, ka përfunduar Haxhiu.
