Këshilltari i lartë i Departamentit Amerikan të Shtetit, Derek Chollet ka njoftuar se sot ka zhvilluar një bisedë telefonike me kryeministrin e Kosovës, Albin Kurti.
Chollet ka thënë se ShBA-ja e mirëpret vendimin e Kosovës për ta pranuar propozimin evropian, i njohur ndryshe si propozimi franko-gjerman, për normalizimin e marrëdhënieve me Serbinë.
“Sot fola me kryeministrin Albin Kurti. Ne e mirëpresim vendimin e Kosovës për ta pranuar propozimin e BE-së për normalizimin e marrëdhënieve me Serbinë, përmes dialogut të lehtësuar nga BE-ja”, ka shkruar Chollet në Twitter.
Ai ka thënë se tani duhet zbatimi i plotë i propozimit evropian për t’i siguruar benefitet për të dy shtetet.
“Tani duhet implementimi për t’i siguruar përfitimet domethënëse për të dyja shtetet. Do të përkrahim hapat vijues mbi propozimin e BE-së”, ka shkruar Chollet.
Këtë shkrim të Chollet e ka shpërndarë ambasadori amerikan në Kosovë, Jeff Hovenier duke thënë se ky progres është domethënës për Kosovën.
“Ne do të mbështesim plotësisht hapat e ardhshëm për propozimin e BE-së. Ky progres është domethënës për Kosovën, duke qenë se ne mbështesim integrimin e saj të plotë euro-atlantik dhe në organizatat ndërkombëtare”, ka shkruar Hovenieri.
Kujtojmë se pas një takimi në Prishtinë në fillim të kësaj jave me përfaqësuesin Special të Bashkimit Evropian për dialogun, Miroslav Lajçak, kryeministri Albin Kurti kishte deklaruar se Kosova e pranon propozimin e BE-së si një bazë të mirë për diskutime të mëtutjeshme.
