Instituti Kombëtar i Shëndetësisë Publike të Kosovës deklaron se situata epidemiologjike mund të përkeqësohet gjatë ditëve në vijim, transmeton Kosova Post.
IKSHPK-ja, përmes një postimi në Facebook, vlerëson se në rritjen e numrit të rasteve pozitive me COVID-19 ka ndikuar edhe shfaqja e variantit të ri të SARS CoV-2 Omicron.
“Nga fillimi i vitit ka filluar rritje e rasteve pozitive me COVID-19 e veçmas me shfaqjen e variantit të ri të virusit SARS CoV-2 Omicron (B.1.1.529). IKSHPK është duke vazhduar pandërprerë me testimin dhe gjurmimin e të gjitha rasteve, kontakteve të rasteve në komunitet dhe diagnostikimin laboratorik. Situata epidemiologjike mund të përkeqësohet edhe më shumë ditët në vazhdim, andaj IKSHPK apelon tek të gjithë qytetarët që të respektohen masat e Qeverisë së Republikës së Kosovës”, thonë nga IKSHPK.
IKSHPK-ja ka bërë thirrje të respektohen masat anti-COVID. Po ashtu, iu ka rekomanduar institucioneve përgjegjëse të mbikëqyrin respektimin e masave.
“Për shkak të rrezikshmërisë së lartë të përhapjes së COVID-19, bëjmë thirrje në veçanti për kujdes dhe mosgrumbullim. Ndërsa, rekomandojmë institucionet përgjegjëse të mbikëqyrin me përpikëri dhe të ndërmarrin të gjitha veprimet e nevojshme për zbatimin e masave për parandalimin dhe luftimin e pandemisë”,bëjnë të ditur nga IKSHPK.
Tutje, IKSHPK, apelon tek qytetarët që të mbajnë distanca fizike, maskat, dezinfektimi dhe ajrosja e hapësirave.
“Është i domosdoshëm kujdesi i shtuar i të gjithëve që në mënyrë strikte të respektohet distanca fizike, të përdoren maskat, të bëhet dezinfektimi dhe ajrosja e hapësirave, duke pamundësuar dhe shmangur përhapjen eventuale të mëtejme të infeksionit të COVID-19”, thotë IKSHPK.
Për më tepër, zyrtarët nga IKSHPK-ja, bëjnë thirrje për vaksinim, për ta parandaluar COVID-19 dhe vdekjet si pasojë e tij.
“Duke qenë se vaksinimi është mënyra më e mirë dhe më e sigurt për të parandaluar COVID-19, veçanërisht format e rënda të sëmundjes dhe vdekjet, ne vazhdojmë të apelojmë fuqishëm për vaksinim sa më gjithpërfshirës, sa më të gjerë dhe sa më të shpejtë të popullatës nga mosha 12 vjeçare. Vaksinat mund të merren çdo ditë në të gjitha institucionet e kujdesit parësor në komunën tuaj”, shkruan tutje në njoftimin e IKSHPK-së.
Njëkohësisht , IKSHPK apelon për marrjen e vaksinave, siç thonë zyrtarët, për të mbrojtur vetën dhe të tjerët.
“Gjithashtu apelojmë për vaksinimin me dozën përforcuese dhe dozën e tretë që mund ta marrin të gjithë qytetarët e moshës mbi 18 vjeçare. Vaksinohuni dhe ftoni të tjerët të vaksinohen! Duke u vaksinuar vetë, ju mbroni veten, mbroni edhe njerëzit për rreth jush, në rend të parë familjen. Vaksinimi mbetet arma më e fortë për të parandaluar hospitalizimin. Të gjithë pa dallim dhe domosdoshmërisht duhet të vazhdojmë të zbatojmë masat parandaluese kundër COVID-19 dhe rekomandimet e profesionistëve shëndetësor!”, apelon IKSHPK.
