Ka shënuar 5 gola në 3 ndeshjet e tij të para në kampionat: Randal Kolo Muani tashmë ka hyrë në zemrat e tifozëve të Juventusit. Publiku bardhezi më në fund ka ndjesinë se ka gjetur sulmuesin e duhur për të finalizuar manovrën e ekipit të Thiago Motta-s, një detyrë që deri tani nuk është përmbushur siç duhet nga Vlahovic.
Francezi po tregon se di të shënojë gola në mënyra të ndryshme dhe, pasi ka shfaqur cilësitë e tij në Serinë A, nesër mbrëma do të ketë një objektiv të rëndësishëm: të konfirmohet edhe në arenën europiane.
Në fakt, është në program ndeshja e parë e playoff-it të Champions League kundër PSV-së, një përballje e shumëpritur nga tifozët juventinë. Sipas Tuttosport, deri mbrëmë ishin shitur rreth 38 mijë bileta për këtë sfidë.
Objektivi për një stadium të mbushur plot është shumë pranë për ndeshjen ndaj holandezëve, ndërsa është tashmë e sigurt që ‘Allianz Stadium’ do të jetë i tejmbushur për supersfidën e së dielës mbrëma kundër Interit. Kjo prani e madhe e tifozëve nuk është diçka e re, por pa dyshim ka ndikuar edhe ardhja e Kolo Muanit në Torino dhe impakti i tij i jashtëzakonshëm.
