Të Hënen e kësaj jave me datë 15 shtator, rreth orës 18 në fshatin Mirushë të Malishevës ndodhi një përleshje fizike mes 12 personave ku me këtë rast ka ndërhyrë edhe Policia e Kosovës.
Sipas burimeve të KosovaNews ngjarja ka ndodhur afër restaurant “Bimi 2” ku po mbahej tubimi i partisë NISMA Socialdemokrate. Incidenti filloi kur persona të afërt me kryetarin e Malishevës Ekrem Kastrati e kryetarin e partisë NISMA Fatmir Limaj, kishin parkuar automjetet e tyre jo në oborrin e restaurantit ku po mbahej tubimi, por në një autolarje përball, duke e pamundësuar aktivitetin biznesor. Pronarët e autolarjes kishin reaguar duke ju thënë që t’i largonin makinat nga aty sepse po i pengojnë, ku fillimisht u fjalosën dhe më pastaj situata kishte eskaluar në përleshje të dhunshme fizike.
Policia e Kosovës ishte prezente në vendin e ngjarjes dhe kishte ndërhyrë me shkopa gome duke vënë nën kontroll situatën, ku me këtë rast kishte shoqëruar në stacion disa persona për intervistim.
Për çudi kjo ngjarje ditën e nesërme nuk ishte publikuar në raportin 24 orësh të Policisë së Kosovës!
KosovaNews ka kontaktuar me drejtorin e Policisë së Malishevës Nazmi Zogaj i cili e ka konfirmuar rastin. Zogaj fillimisht tha se nuk ka qenë diçka serioze mirëpo kur e përballëm me të dhëna të sakta nuk deshi të jap informacione të detajuara duke thënë se nuk është i autorizuar të flas.
“Ne ja kemi dhanë një konfirmim drejtorisë sonë në Gjakovë mirëpo nuk ka pasur diçka serizoze i kemi njoftu ata çka ka ndodhë nuk është diçka problem dhe nuk jam i autorizum me dhanë këtë lajm për momentin.
Gazetari: Jo aty ka pasur serioze sepse ka ndërhy policia me pendrak?
Zogaj: Po ka ndërhy për që u prishë rendi dhe qetësia publike rasti është në 24 orësh
Gazetari: jo nuk është në 24 orësh
Zogaj: jo është në 24 orësh, prokurori është njoftuar ne e kemi dërgu në drejtorinë e policisë rajonale në Gjakovë po pse në Prishtinë nuk është publiku në raportin 24 orësh se ndoshta e kanë marrë si rast i lehtë që është” ka thënë për KosovaNews z.Zogaj
Ndërkohë KosovaNews ka dërguar pyetje në Drejtorinë Qëndrore të Policisë së Kosovës për të marrë më shumë informata lidhur me rastin, njëherit për të mësuar se pse kjo ngjarje nuk ishte publikuar në raportin 24 orësh?
“Referuar kërkesës suaj ju informojmë se, me datën 15.09.2025 rreth orës 18:00, njësitë policore nga Stacioni Policor në Malishevë, kanë reaguar në një rast i cili ishte raportuar si përleshje fizike në mes të disa personave në fshatin Mirushë.
Policia ka ndërmarrë veprimet e nevojshme policore dhe ka shoqëruar gjashtë persona në Stacion Policor në Malishevë, të cilët dyshoheshin se kishin qenë të përfshirë përleshje fizike. Gjatë deklarimit të tyre me shkrim kanë treguar se përleshja ka qenë e çastit për shkak të pengimit në vendin e punës, përkatësisht parkimit të veturës në hyrje të autolarjes. Të njëjtit kanë treguar se nuk kanë pasur arsyeje tjera, përkatësisht motive tjera që ka quar deri te përleshja fizike.
Lidhur me të gjitha veprimet policore është hartuar raport me shkrim dhe po ashtu është njoftuar prokurori kujdestar i shtetit i cili ka dhe sugjerimet e tij për rastin. Ndërsa me datën 16.09.2025 janë intervistuar edhe dy persona të tjerë në cilësinë e të dyshuarve.
Po ashtu lidhur me këtë është kontaktuar prokurori i shtetit me urdhër të të cilit janë intervistuar personat si dhe është hapur rasti “Lëndim i lehtë trupor”, i cili ka kaluar ne procedurë të rregullt. Më datë 17.09.2025, në ora 09:00 rasti procedohet në Prokurorinë Themelore në Gjakovë. thuhet në përgjigjen e Policisë
Drejtoria Qëndrore e Policisë ka thënë se ky incident nuk është futur në raportin 24 orësh për shkak se për rastet e lëndimeve të lehta trupore nuk përpilohet raport i shpejtë, andaj nuk përfshihen të gjitha rastet në raportin 24 orësh të Policisë së Kosovës.
“Bazuar në veprimet e zyrtarëve policorë, përpilimin e raportit me shkrim dhe kontaktin e prokurorit të shtetit, vlerësohet se janë realizuar në mënyrë pozitive veprimet policore të cilat bazohen në procedurat e parapara ligjore, përfshirë edhe mos dërgimin e raportit për përfshirje në raportin 24 orësh në nivel qendror, pasi sipas procedurave standarde të operimit për Informim përmes raporteve të shpejta, për rastet e lëndimeve të lehta trupore nuk përpilohet raport i shpejtë, andaj nuk përfshihen të gjitha rastet në raportin 24 orësh të PK-se.” thuhet në përgjigjen e Policisë së Kosovës.
