Policia e Kosovës ka bërë të ditur se ka arrestuar burrë e grua të martën në Ferizaj për “deklarim të rrejshëm”.
Fillimisht, Qendra Emergjente në Ferizaj e ka informuar policinë më 29 tetor rreth orës 23:00, se një grua e moshës 21 vjeç, shtetase e huaj me vendbanim në Ferizaj është duke u trajtuar aty.
Sipas policisë, 21-vjeçarja dyshohej se ishte sulmuar me një mjet të mprehtë nga një person tjetër.
“Policët e rendit menjëherë kanë shkuar në këtë qendër ku dyshohej se në rrugën ‘’Tahir Sinani’’ në Ferizaj viktima ishte sulmuar nga një person tjetër me një mjet të mprehtë (thikë) dhe ishte larguar në drejtim të panjohur”, thuhet në njoftim.
Në cilësinë e dëshmitarit, policia ka intervistuar edhe bashkëshortin e saj, të moshës 29 vjeçare, i cili fillimisht kishte dhënë versionin e njëjtë të sulmit nga një person tjetër, ndërsa rasti fillimisht është cilësuar ‘’Lëndim i lehtë trupor’’.
Por gjatë hetimeve në shtëpinë e tyre ku ishin duke banuar çifti, policia ka hasur në gjurmë gjaku dhe një thikë e cila dyshohet se ishte përdorur gjatë një përleshje mes tyre.
Bashkëshorti E.B, i cili kishte edhe lëndime trupore ka pranuar se kanë inskenuar rastin së bashku me bashkëshorten e tij dhe kanë deklaruar rrejshëm.
Të dyshuarit pasi kanë marrë tretmanin e nevojshëm mjekësor janë shoqëruar në stacionin e policisë në Ferizaj dhe me vendim të prokurorit të shtetit rasti është ricilësuar si ‘’Lëndim i lehtë trupor’’, ‘’ Dhunë në familje’’ dhe ‘’Deklarim i rremë’’, ndërsa të dyshuarit janë ndaluar në mbajtje për 48 orë, për procedura tjera hetimore.
